Мейлан Нежефов
Улихьна йигъари Хив райондин администрацияйиъ хусуси метлеб айи дявдин операцияйиъ жюрэтлувал улупури, жвуван Ватан уьбхбаз чпин уьмур бахш гъапIу кьягьяларин хизанариз, абйир-бабариз ва багахьлуйириз кюмек тувбан ва дурарин яшайишдин читинвалариз даягъ хьпан ният ади, совещание кIули гъубхнийи.
Совещание «Вари сатIиди» фонднан кIулиъ айи Селимхан Мирзехановдин регьберваликкди гъубшнийи. Райондиан СВО-йиъ иштирак шулайидарин ва игьтияж’вал айи аьдати хизанарин меселйир гьял апIуз чарйир агури, совещаниейиъ райондин главайин сарпи заместитель Агъамирзе Гьямзабегов, Хив ва Агъул районарин дявдин комиссар Сулейман Гьюсейнов, райондин КЦСОН-дин директор Аьбдулязиз Агъамирзаев ва УСЗН-дин директор Рейфудин Юсуфов, образованиейин отделин сарпи заместитель Азадин Юсуфов иштирак гъахьнийи.
СВО-йиан отпускайиз дуфнайи ва совещаниейиъра иштирак гъахьи Селимхан Киберовдикан му серенжемдин гьякьнаан чан фикрар ачухъ апIуб ккун гъапIнийза.
«Ихь республикайин кIулиъ айи Сергей Меликовдин къарарниинди мициб ляхин гъабхувализ йиз ва дявдин майдандиъ узухъди хъайи дустарин терефнаан чухсагъул пуз ккундузуз. Дугъриданна, райондин администрацияйи гъи му месэлйир гьял апIувализ вари терефарианди кьувват тувра. Уьмриан гъушу ихь игитарин ччвурар кючйириз ва мектебариз тувуб, дурар яшамиш шули гъахьи хуларин ва дурар урхури гъахьи мектебарин цалариъ мармардашдин гъванар итуб, дурарин рюгьяриз бахш дапIнайи жюрбежюр серенжемар ва спортдин талитар гъахуб гъи райондиъ аьдат дубхьна.
Аргъаж шулайи наслариз мурар уьмрин дарсар ву. Гъи ихь райондин агьалйири, бязи хизанариз дявдиан гъюрайи дерднан хабар, хажалат чпинубси гьисс апIури айивали, ихь сабвал ва ухьу сар-сариз кюмекназ гъюз гьязурвал улупура. Шли гафниинди, шли ляхниинди ва эскрариз апIурайи гьюрматниинди, хъа шли пулин дакьатариинди ва гуманитарный гъагъниинди кюмек туври, гъалибвал багахь апIбак гьарури чан пай кивра. Думу гьаци вуйиб дявдин майдандиъ айи ихь баярира гьисс апIура. Диди учук хлинццар кивра ва хъана аьхю гьунарариз юкIв капIра. Мидланра савайи, дилаварчйири ва меценатари гъабхурайи ляхнизра аферин кIурача. Ихь райондин агьали, меценат Балакерим Мягьямедовди чан дакьатарикан хьуб хизандигъна 2 миллионна гьацI (гьарсаб хизандиз хьудварж агъзур манат) тувну. Аллагьди думу чан веледарикан, худларикан юкIв шадди, жан сагъди гъитричав. Гъи ихь арайиъ мицисдар рягьимлу касар цIиб адар. Гьелбетда, сар абайизра, бабазра мициб пул кьисмат дарибшри… Хъа думу ихь хлиъ айиб дар, фици дибикIнаш, гьаци хьибди. Анжагъ ихь адмивал дудрубгри ва кюмек лазим вуйи хизанариз ухьу улар тIаъну лигру ва кюмек апIру агьларикан ишри», – хаиш апIура Селимхан Киберовди.
