Гюльнара Мягьямедова
Ихь республика ужуди артмиш хьпаъ манигъвалар даршбан бадали, миллетарин, жа-жара дин хъапIрударин арайиъси, ислам диндин жюрбежюр терефар уьрхрюдарин арайиъра албагу аьлакьйир ади хьуб лазим ву. 23-пи июнди Мягьячгъалайиъ ва Дербентдиъ гъахьи гьядисйири республикайиъ айи аьгьвалат гъизгъин дапIна. Гьадму ва жара дюшюшарихъди аьлакьалу вуди, Дагъустан Республикайин муфтиятди бязи жигьил дишагьлийири алабхьурайи никьаб вахтназди гъадагъа гъапIну. Дидин гьякьнаан РД-йин муфтийин заместитель Аьбдулла Салимовди мялумат тувну. Дугъан гафариинди, муфтиятди никьаб алабхьувал гьаргандиз гъадагъа дапIнадар, хъа вахтназди никьаб алабхьувалихьан ярхла хьуб ккун апIура. Республикайиъ политикайин аьгьвалат читин дубхьнайивалихъди аьлакьалу вуди, думу къарарин бинайиъ дишагьлийин хатIасузвал уьбхюб а.
Саб пай дагъустанлуйири никьаб гъадагъа апIувал чарасуз ляхинси кьабул гъапIну, фицики инсандин маш ккебкру палат тахсиркарвал апIуз ккуни касди ишлетмиш апIуз мумкин ву. Хъа, гьадму палат алабхьну лицурайи тмуну пайну, муфтиятдин къарарнахъди чпин наразивал улупура. Социальный сетариъ гьадддин кIуллан аьхю улхбар-рахбар гъитIирккна.
Дагъустан Республикайин гьюкмари мициб аьгьвалат ислягьвалиинди дигиш апIуз рякъяр агура.
«Август вазлин гьацIариз Дагъустан Республикайин Главайин багахь хьайи жюрбежюр миллетарин ва динарин арайиъ айи аьлакьйирин ляхнариз лигру советдин заседание гъабхуб планламиш апIураза. Душваъ гьаму цирклариъ дубхну ккуни цIийи ляхнин месэлйир гьял апIидихьа», – къайд апIура Сергей Меликовди чан телеграм каналиъ.
Заседаниейиъ швнубна-саб тема гъитIибккбанди ву. Мисалназ, бицIидарихъди гъабхру ляхнин гьякьнаан теклифар. «Гъи гьарсар кас чан хусуси ляхниин машгъул духьну ккунду: аьлимди илим тувру, мялимди дарс кивру, тренери чан аьгъювалариинди живанар вердиш апIуру. Дурари, теологар духьну, бицIирин кIулиъ диндин жюрбежюр фикрар ивну ккундар. Гьациб тясирлувалихьан бицIидар уьрхювал – му ихь улихь дийигънайи важиблу месэлйирикан ву», – гъапну республикайин главайи.
«Кьюбпиб, муниципалитетарин кIулиъ айидари чпин ихтиярнаъ айи жилариин али диндин идарйирин ляхниин – дурари къанундиз асас вуди ляхин апIураш, мистариъ айи медресейириъ бицIидариз фу улупураш – гюзчивал дубхну ккунду. Жвуван ватанагьлийириз аькси вуди, мялум дару касари ихь бицIидарин кIулиъ фу тIапIраш аьгъю апIувал чарасуз лазим ву. Диндин кIулиъ айидарира гюзчивал гъабхуб мясляаьт апIура. Ухьухь вари инсанари радикал тереф дибиснадар кIури, швнуд йигъ вуйиз. Хъа радикал тереф уьбхрударра а. Гьюрматлу муфтий, шейх Аьгьмад –Афандийи гъапиганси, думу бала узук кубкIидар кIури, терроризмдин гьяракатарихьна вижнасузди янашмиш духьну ккундар. КубкIди.
Ихь сюгьбат ачухъуб, гьякьлуб, мянфяаьтлуб, саб гафнахъна хруб шул кIури, умуд кивраза. 23-пи июнди гъахьи жюрейин гьядисйир текрар дархьбан бадали, дурари улихьишв гьадабтIру ляхин дубхну ккунду», – къайд гъапIну Дагъустандин Главайи.
