Мейлан Нежефов

Ихь халкьдин айтуйиъ кIурайиганси, дявди баяр хурдар, дявди баяр анжагъ йихуру. Думу гьаци вуйиб Украинайин жилариин гъябгъюрайи хусуси метлеб айи дявдин операцияйира субут апIура.

 

Ватандин улихь чпин буржи тамам апIбаъ жвуван хушниинди ктабгъу рякъюъ гъи хайлин ихь ватанагьлийирра миллетчйирихъди гъахурайи гъагъи женгариъ уьмриан гъягъюра. Му гъамлу сиягьназ улихьна йигъари Хив райондин Хив гъулан агьали Давид Рамазановра дахил гъахьну.

Давид 22-пи июлиъ талаф гъахьну. Хъа багъри гъулаъ думу фаракьат апIуз анжагъ 5-пи августдитIан гъахьундар.

Давид Рамазанов 1993-пи йисан 6-пи сентябри Рамазановарин тухмиъ бабкан гъахьну. Багъри гъулан мектеб ккудубкIбалан кьяляхъ дугъу, эскервалин буржира тамам дапIну, 2019-пи йисан октябрин вазли военный контрактдиин къул гъизигнийи. Сабпи йигъланмина хусуси метлеб айи дявдин операцияйиъ иштирак шулайи 3-пи мотострелковый батальондин 3-пи взводдин машиндихъ хъайи Давид Рамазанов Жуковдин медалииндира лишанлу дапIнайи. Цци дугъу Ростовдиъ заочно вуди кучIвнайи правойин ва алвер апIбан колледжра ккудубкIурайи…

Рамазановарин хизандин дерд-хажалат пай апIури, саламдиз варжариинди инсанар гъафнийи. Райондин администрацияйин ва агьалйирин терефнаан хизандиз башсагълугъвал ва кIван сабур ккун апIури, райондин глава Ярмет Ярметов, Хив ва Агъул районарин дявдин комиссар Сулейман Гьюсейнов удучIвну гъулхнийи.

«Гьарсар касдиз жил’ин варитIан багьалу вуйиб жвуван жан ву. Хъа гьадму жан уьмрин ужудар чагълариъ айи вахтна, Ватан ва халкьдин закурин гележег акуб хьпак аьхю умуд кади, гъалибвал, дюзвал ва ислягьвал жилиина хуз халис пай киври уьмриан гъушу игит Давид ихь юкIвариъ гьаргандиз гъузди. Душмниз йирфар диривди ва чан ифдин цIадал гьяйиф дарапIди уьмриан гъушу кьягьял ихь наслариз аьсрариинди нумуна хьиди», – гъапнийи райондин гьякимари.

Жигьили сач 5-пи августди чан уьмур Эльвина кIуру шурахъди ккабалгнийи. Гьяйифки, инсафсуз дявди мани ужагъ гьаргандиз мичIал гъапIну.