Наргиз Гюлечова
Украинайин аьтрафариин гъябгъюрайи хусуси метлеб айи дявдин операция ккебгъу йигъланмина, душваъ иштирак шулайи табасаран эскрарин кьадар фукьан вуш аьгъдру касар Дагъустандиъ гьич зат имдаршул. Эскрарихъди сабси, медицинайин гъуллугъчйирира жанлуди, чпиин али пишекарвалин буржи тамам апIури, зийнар гъахьи эскрариз кюмек апIура. Хусуси метлеб айи дявдин операцияйиъ эскервалин буржи тамам апIурайи медицинайин гъуллугъчйирин арайиъра табасарарин кьадар цIиб дар.
Табасаран райондин ТинитI гъулан агьали Эльдар Рашидов Урусатдин Президент Владимир Путиндин Указдиинди «Йихурайидар аьжаликкан ккадагъбаз лигну» медалиинди лишанлу дапIна.
Зийнар духьнайи эскрар кми-кмиди хурайивализ лигну, Эльдар Рашидовдихъди аьлакьайиз удучIвну, сюгьбат гъабхуз читинди алабхъунзуз. Гьаддиз дугъу чан адаш Гьямид Рашидовдихъди сюгьбат гъабхуб ккун гъапIнийи, фицики балин уьмрикан адашдиз вари мялуматар а. Духтрин мициб тIалабниин узура рази гъахьиза.
Ич сюгьбатнаъ Гьямид Рашидовди гъапиганси, Эльдар, 2004-пи йисан Избербаш шагьрин мектеб ккудубкIну, Астрахандин медицинайин академияйин гьязурвалин курсарик кучIвру ва сад йислан академияйин студентра шулу. 2014-пи йисан думу «травматолог-ортопед» пишейин сагьиб шулу ва дишлади Краснодар шагьрин тяди кюмекнан больницайиъ ляхин апIуз хъюгъру. 2019-пи йисан жигьил пишекри, Дербентдиз кьяляхъ дуфну, шагьрин кьялан больницайиъ травматолог-ортопедди ляхин апIуз хъюгъру.
«Учуз шубур велед ачуз, хъа Эльдар ич аьхюнур бай вуйич. Вари эвленмишра дапIнача. Эльдар чан хизандихъди жаради яшамиш шула. Учухъди бицIину бай Зафар чан хизанра хъади яшамиш шула.
БицIи вахтарихъанмина Эльдар гьаммишан инсанариз кюмек апIуз ккунир вуйи. Гьаддиз чан уьмрин рякъ вуди дугъу духтирвалин пише ктабгъну.
2014-пи йисхъанмина больницйириъ инсанариз гьаммишан кюмек апIури вердиш вуйи бали, Украинайин аьтрафариин хусуси метлеб айи операция ккебгъу йигъланмина, дина душну, зийнар шулайи эскрариз кюмек тувуз кьаст гъапIнийи. Амма эвелиан учу дугъаз душваъ иштирак хьуз ихтияр туври гъахьундарча. Хъа гьаму ражари, учуз дидкан зат дарпиди, закур гъягъюру кIуру йигъан мялумат дебккну. ИкибаштIан, сарун къаршу гъахьундарча, фицики дугъан эскрариз чахьан шлу кюмек апIуз яман кьаст ади гъабхьнийи. Чан хушниинди Украинайиз душну, женгар гъягъюрайи аьтрафариин зийнар духьнайи эскрариз кюмек туври, Эльдарин магьа сад йис ву. Заан намуслувалиинди жвуван ляхин тамам апIбаз лигну, дугъаз Владимир Путиндин Указдиинди медалра тувну. Гизаф разира гъахьунча», – кIура духтрин адашди.
Гьямид Рашидовдин гафариинди, бали абйир-бабариз чав лихурайи йишваъ кIули гъягъюрайи гьядисйирикан зат ктибтури шулдар. Хъа зийнар гъахьидарин фицдар операцйир апIураш, дугъан социальный сетариан узуз кми-кмиди рябкъюри шулузуз. Аьхиримжи ражари Эльдари ва дугъан гъарашугъари сатIиди операция дапIну, фу-вуш дутIубкIну сар ихь эскрин гъурдлариъ абснайи хилин гагьсибкьан аьхю рукь адабгънийи. ИкибаштIан, гьадму жюрейин операцйир дурари саки гьар йигъан швнуб-саб кIули гъахура. Ликар-хилариз зийнар духьнайидар, янаки сагъ апIуз шлудар гьадушваъ чпи сагъ апIури, хъа гъагъи гьялнаъ айидар Москвайиз, Севастополиз гьаъра.
Читинваларра алалахьри адар. Гьаци вушра, чав гъибису кьастниин зат швумал дархьиди, Эльдар Рашидовди пишекарвалин буржи тамам апIури, инсанар сагъ апIуз кюмек тувра. Гъит чаз хъанара артухъ кьувват ва сагъвал туври Аллагьди.
