Аьхиримжи кьюд йисандин арайиъ Дагъустандиъ республикайин мяна ади кIули гъягъюри шлу культурайин фунуб серенжемдиъра ихь бицIи ватанагьли – Рушв’ил гъул’ан вуйи Севгилим Гьяжиибрагьимова адарди шуладар.
Сач Дагъустандиз Урусатдин Федерацияйин Советдин кIулиъ айи Валентина Матвиенко гъафи вахтна, Дербентдин Нарин-гъалайиин дугъаз ва имбу хялариз Севгилимди ва дугъан дада Зариятди халачи фици убхруб вуш улупнийи, табасаран дишагьлийирин сяняаьтдикан лап маракьлу мялуматар тувнийи. Шуру Валентина Матвиенкойин жюрбежюр суалариз жавабарра тувнийи.
Хъа кьюд гьяфтайилан, Дербентдиъ нубатнан серенжемдиъ чаз Сергей Меликов алахъиган, Севгилимди дугъаз, улихьган чпи сатIиди гъиву шикил чахьна дурубкьну адруваликан аьрз гъапIнийи, ва Дагъустандин Главайи дугъахьди сабсан ражари шикил гъивнийи.
Цци «Урусатдин тарихдинна культурайин ирс» Парламентдин 9-пи форумдиз Дербентдиз гъафиган, Федерацияйин Советдин кIулиъ айири Севгилимдиз сентябрин вазлиъ Кремлийин аьхю залиъ Расул Гьямзатовдин 100 йисандин юбилейиз бахш дапIнайи серенжемариъ иштирак хьуз теклиф гъапIну. Дидин кьяляхъ ихь ватанагьли риш чан кабинетдиъ кьабул дапIну, Валентина Матвиенкойи дугъаз пешкешарра тувну.