Хусуси метлеб айи дявдин операцияйиъ иштирак шулайи эскрарин дадйир вари заан гьюрматназ лайикь ву. Учу цци СВО-йиъ иштирак шулайи юкьур балин дада, Табасаран райондин Гюгьрягъ гъул’ан вуйи Сусанханум Хайруллаева жаради къайд апIуз ният гъапIунча.
Дугъан баяр – Рафутдин, Нежмутдин, Бинадин ва Айнутдин – Украинайин аьтрафариин женгариъ иштирак шула. Росгвардияйиъ прапорщикди гъуллугъ апIурайи Рафутдин сач июнь вазлианмина Харьковский область бадали женгариъ иштирак шула, кьюб-шубубан дугъаз зийнарра гъахьну, думу Кьягьялвалин ордендихьна улупна. Дявдин гьяракатар ккергъхъанмина аьлакьа тямин апIру бригадайиъ ротайин старшина Бинадинра, хусуси метлеб айи кьушмариъ минометарин отделениейин командир Айнутдинра Украинайиъ а. Взводдин командирин заместитель Нежмутдин ДНР ва ЛНР миллетчйирихьан азад апIбан йивбариъ иштирак гъахьну.
Цци 8-пи мартдин гъаншариъ Сергей Меликовди игитарин дада Сусанханум Хайруллаева, баяриз ватанпервалин тербия тувбаз лигну, Амет-Хан Султандин ччвурнахъ хъайи медалиинди лишанлу гъапIну.
«Узу дурар бицидихъанмина зегьметнахьна вердиш вуди, ляхин апIуз юкIв хъади, читинвалар ккагъуз гьязур вуди ва ватандихьна ккунивал ади тербияламиш гъапIунза. Дурариз байвахтнахъанмина военный гъуллугъчйир хьуз ккундийи. Дурари Ватандиз гъуллугъ апIури гьахьну, гъуллугъ апIура ва гъуллугъ апIиди», – гъапнийи дадайи чан дирбаш баярин гьякьнаан.