Каспийск шагьриъ жюрбежюр халкьарин сяняаьткарвалин шей’арин милли студия ачмиш дапIну, кьюд йис дубхьна. Думу студияйин кIулиъ айир ихь ватанагьли, Табасаран райондин АхьитI гъул’ан вуйи Назира Нурова ву.
Студияйиъ учIвубси улариз сабпи нубатнаъди рякъюрайидар милли халкьарин палтар али жаквлар вуйи. Гьаддихъди сабпи, мушваъ халачйир ришру бицIи дуркьарра ва хайлин халкьарин сяняаьткарвалин шей’арра рякъюра. Назирайиз дурар уч апIуз чан майил-мадатари кюмек гъапIну. Студияйин цалик кебхнайи уччвуб гьалав, жиликк ккирчнайи халачйир вари дугъан мирасари тувдар ву. Гьаци кIулихъ хъахьру улихьдин деврин ягълухъарра…
Назирайин му ляхниин машгъул хьувалин рякъ, ялхъвнар апIури ансамблийигъ гъяйи чан шурлан ккебгъуб ву. Сягьнайиина удучIвруган, кми-кмиди милли халкьарин палтар лазим шуйи, хъа дурар гьаммишан пулихъ гъадагъуз удудукьрувализ лигну, Назирайи учв чан шураз лазим вуйи жюрейин палтар дирхуз хъюгъну. Гьаци дугъу вари ансамблиз хусуси жюрейин палтар дугъу гъидирхну. Му ляхин кьабул гъабхьири, Назирайи цIиб вахтналан, милли халкьарин палтар дидирхну жаквлариин алахьну, гьадму жаквларин шиклар йивну, чан социальный сетариъ ирчну. Инсанари мугъан ляхниз ужуб кьимат дивуз хъюгъну ва гьаддихъан му ляхин апIувал Назирайи давам гъапIну.