16-19-пи майди Каспийск шагьриъ айи «Анжи-Арена» стадиондин аьтрафариин Урусатдин жинснан марччаринна цIигьарин XXIII выставка кIули гъубшну. Выставкайиз Урусатдин 26 региондиан вуйи 90-тIан артухъ мяишатариан 30 йиккун ва ужуб хьа али жинсарин 450-тIан артухъ марччарна цIигьар гъахнийи.
Выставка кIули гъубшу 4 йигъандин арайиъ, гьар йигъан 4 агъзуртIан артухъ инсанар гъюри, чарвйириз ва цIигьариз лигуз республикайин муниципалитетариан ва гьацира гъунши регионариан гъафи агьалйирин кьадар 16 агъзуртIан артухъ гъабхьнийи.
Чарвйирин кьадарниинди Дагъустан Республика Урусатдин кIакIначи регион ву. Гьаци вуйивализ лигну, Урусатдин жинснан марччаринна цIигьарин XXIII выставкайиъ Дагъустандианра 20 малдарвалин мяишатар ва РД-йин Федеральный гъулан мяишатдин илмарин центрин вакилар иштирак гъахьнийи.
Выставкайин дахилнаъди Дагъустан Республикайин гъулан мяишатдин ва ипIру-убхъру сурстарин министерствойи серенжемдиъ иштирак шулайи хайлин регионарихъди малдарвалин циркил сатIиди артмиш апIбан ва чиб-чпин тажрубайин ужудар терефар ишлетмиш апIбан ният ади йикьрарра гъийитIну.