Ихь табасаран миллетдин вакиларикан фунур касра заан гъуллугънаъ дерккну ади хьуб ухьуз аьхю шадвал вухьуз. Гьаму 2023-пи йисан табасаранарикан варитIан заан гъуллугънаъ тяйин дапIну айир Ризван Мурадов ву.
Думу 2023-пи йисан 29-пи мартдиъ «Газпром межрегионгаз Махачкала» компанияйин директорарин советдин къарарниинди му тешкилатдин генеральный директорди дерккнийи.
КIваина хурача, 2021-2022-пи йисари Ризван Мурадов республикайин тикилишчивалин ва ЖКХ-йин министрди, хъа 2022-пи йисан февралихъан 2023-пи йисан январизкьан Дагъустан Республикайин энергетикайин ва тарифарин министрди гъилихнийи.
Ихь ватанагьли кIулиъ ади цци гъапIу ляхнарикан жикъиди пидича.
Гъубшу йисандин тялукь вахтнахь тевиган, республикайиъ 2023-пи йисан хулар газдихъ хъитIбан гьяракат 4 ражари артухъ гъабхьну. Гьаму йисан 3,3 агъзур хулариз газ дизигна, хъа программа кьувватнаъ убчIвхъанмина 4,6 агъзур хуларин сяргьятарихъна газдин турбйир дизигна ва газ ишлетмиш апIрударихьан 7,7 агъзур аьрза кьабул дапIна.
Дагъустандиъ ишлетмиш гъапIу газдихъан онлайн-сервисариан пул туврударин кьадарра сачтIан 4 ражари артухъ гъабхьну.