Бабаев Хочбар Рамазанович Хив райондин Гъвандикк гъулаъ РД-йин культурайин лайикьлу гъуллугъчи Рамазан Бабаевдин хизандиъ бабкан гъахьну.
2006-пи йисланмина Хочбар Бабаев Сургут шагьриъ яшамиш шула. Дугъу му шагьриъ «Ватан» ччвур али ансамбль яратмиш гъапIну, 2009-пи йисан ялхъвнарин коллективдиз «халкьдин ансамбль» ччвур тувну. Сургут шагьриъ ва кIулди Ханты-Мансийский автономный округдиъ «Ватан» ансамблин иштирак’вал адарди гъи саб мяракара кIули гъябгъюдар. Ансамблиъ айи артистарин 75% дагъустанлуйир ву, 25% – Кавказдин жара республикйирин вакилар ва 5 процент – урсар.
«Гьарсар касди, учв наан яшамиш шулашра, багъри ватан, гъул, милли аьдатар, наслин тарих гьархну ккундар. Ихь халкьарин аьдатарин ччивар лап кьадарсуз деринариъ а. Ухьу дурар уьрхюзси, артмиш апIузра буржлу вухьа. Гьаддиз узу асас вуди ансамблин репертуар милли аьдатарин темайиан гьязур апIураза», – кIура Хочбар Бабаевди.
Цци «Ватан» ансамблин руководитель ва балетместер Хочбар Бабаевдиз Дагъустан халкьдин ялхъвнарин культура артмиш апIбак киву пайназ лигну «Дагъустан Республикайин культурайин лайикьлу гъуллугъчи» ччвурра тувну.
ЙИСАНДИН ХОРЕОГРАФ
![](https://zoritabasarana.ru/wp-content/uploads/sites/13/sites/13/2023/12/hochbar.jpg)