Жабир Мягьямедов кIулиъ ади табасаран жямяаьтлугъ касари, Хив райондин ХурсатIил гъулаъ айи чIвурд цIийи алапIбаъ цци хайлин чарйир гъизигну. Дугъу Республикайин культурайинна тарихдин объектар уьрхюрайи агентствойиан жвуван машиндиъди чIвурд ахтармиш апIуз ХурсатIилна тарихдин объектар цIийи алаъру пишекар хъади гъушну. Реставраторин гафариинди, цалиъ гъванар дивнайи саягъназ лигну, ХурсатIларин чIвурдан яш варитIан цIиб гьисабариинди 400 йис ву, яна Жабир Мягьямедовдин жягьтлувалиинди муганаздин чIвурднан тахминан яшси гьисаб дапIнайи 200 йис дюз алапIуз гъабхьну.
Ихь жигьил ватанагьлийи багъри литература артмиш апIбакра чан пай кивра – дугъу шиърар дикIуру, Табасаран ва Хив районарин мектебариз баяр-шубарихъди гюрюшмиш хьуз ва литературайикан сюгьбатар гъахуз гъягъюри шулу.
Гьамусяаьт халис ватанпервер Жабир Мягьямедов жвуван хушниинди хусуси метлеб айи дявдин операцияйиъ иштирак шула.