«Табасарандин нурар» газатдин рейтингдиинди, «Йисандин культурайин гъуллугъчи» номинацияйиъ Хив райондин администрацияйин культурайинна туризмйин ва жигьиларин политикайин управлениейин кIулиъ айи Казбек Къазиев гъалиб гъахьну. Культурайин цирклиан Казбек КъазиевтIан ужур гъуллугъчи, агурашра, дидрихъур. Думу Хив райондиъ, Дербент ва Мягьячгъала шагьрариъ шлу табасаранарин гьарсаб серенжемдин гьаммишандин иштиракчи, хъа гизаф вахтари – ужур тешкилатчира ву.
Аьхиримжи йисари культурайин цирклиан Хив райондиъ бицIидарин ва аьхюдарин арайиъ гъюгъюрайи мяълийир апIбаан конкурсари ухьу мюгьтал дарапIди гъитрадар. Душваъ гьарсаб машквран йигъ Казбек Къазиевдин тешкиллувалиинди шадлугънан серенжемдиз илтIибкIура. Райондин гизаф гъулариъ культурайин идарайин тешкиллувалиинди концертар ва театрин спектаклйир гъахура. Гьацира, туризмйин цирклиъра, райондиз туристар жалб апIбаъ Казбек Къазиевди аьхю роль уйнамиш апIура.
Йисан аьхириъ ЦIийи йис къайд апIури, Хив райондиъ «Метлебарин елка» акция тешкил апIувал аьдатнаъ абхъна. Думу серенжемди райондин хайлин бицIидарин юкIвар шад апIура. Му акцияра Казбек Къазиевдин тешкуллувалиинди кIули гъябгъюрайиб ву.