2023-пи йисан Расул Гьямзатовдин 100 йисандин юбилей къайд апIбахъди аьлакьалу вуди, Табасаран театри «Асият» спектакль сягьнайиина адабгъну. Спектакль гьязур апIбиин Санкт-Петербургдиан дуфнайи режиссер Дмитрий Павловди ляхин гъапIнийи. Текст илтIибкIур шаир ва таржумачи Аьбдурягьим Аьбдурягьманов вуйи. Премьера Кьибла Сухокумскдиъ гъубшнийи. Дагълу дишагьли – Асиятдин гъагъи кьисматну тамашачйирин юкIвариз тясир гъапIнийи.
Спектаклиъ вари чпин устадвал лайикь вуйиси улупу артистарилан савайи, саб вазлин арайиъ вердиш апIури гъабхьи гъазра иштирак гъабхьнийи.
Табасаран театрин «Асият» спектакль гьаму йисандин варитIан ужуб премьера вуди гьисаб гъапIунча.
«2023-пи йисан театри, планламиш дапIнайи 4 цIийи спектаклтIан артухъ, сабсана спектакль гьязур дапIну, тамашачйирин улихьна адабгънийи. Дербентдиъ, Мягьячгъалайиъ улупру спектаклйириз тамашачйир аьхю аьшкьниинди уч шулу. Билетар «Пушкинский картайиинди» тувра-йивализ дилигну, гизаф студентарра гъюри шулу. РД-йин культурайин министерствойин «Сягьнайин устадари – Дагъустандин агьалйириз» проектдин дахилнаъди спекталйир хьади Табасаран ва Хив районаризра гъя-гъюри шулача», – кIура театрин директор Аьлимурад Аьлимурадовди.