Му гьюрматлу ччвур учу сабишв’инди кьюр ихь ватанагьлийириз тувуз йикьрар гъапIунча.

Санкт-Петербургдин сакьатвал кайи бицIидариз ва сакьат бабариз кюмек тувру «Аревик» центрин директор Эльвира Аслановайи Санкт-Петербург шагьриъ маиф, ликри лицуз даршлу, ДЦП ва сагъ апIуз даршлу жара уьзрар кайи бицIидариз ва дурарин абйир-бабариз «Инвалидвалин коляскйириъ айидарин бал» серенжем гъабхури, гьамус урчIвуд йис ву.
«Гьар йисан, коляскйириъ айи бицIидар саб йишв’ина уч апIури, дурариз аьхю машквар тешкил апIурача…Йисан саб ражари дурар сюгьрин махъвнан иштиракчйир шула», – ктибтура рягьимлу юкIв айи Эльвира Аслановайи.
Цци думу чав гъабхурайи рягьимлувалин ляхниз лигну Москва шагьриъ «НКО-йин дишагьлийир» ччвур тувнайи Сабпи милли пишекарвалин премияйин конкурсдиъ пешкешнан йишваз лайикьлу гъахьну.

Мягьячгъалайиъ яшамиш шулайи шубур веледдин дада Диана Уьсмановайи 2016-пи йисхъанмина, рягьимлувалин рякъ кадабгъну, йитим, сагъламвалин зяифвал кайи бицIидариз чахьан шлу кюмекар апIура. Дианайи республикайиъ айи абйир-бабар хътру, сагъ апIуз даршлу уьзрар кайи бицIидариз машкврар тешкил апIури, дурариз пешкешар тувра, лазим вуйи шей’ар, дармнар гъадагъуз кюмек апIура. Цци декабриъ «Дианайихъди кюмек апIин» кIуру акцияйин дахилнаъди дугъу 6-пи ражари жюрбежюр уьзрариан иццурайи бицIидар ва дурарин дадйир рягьятвал гъадабгъру «Янтарный» комплексдиз хъади гъушну ва бицIидарин аку апIуз даягъ гъахьну.