Санкт-Петербургдиъ яшамиш шулайи машгьур архитектор Мирзабег Аьлимирзаевди ктабхъурайи йисан ихь Ватандин маракьар уьрхюри, хусуси метлеб айи дявдин операцияйиъ игитси гъакIи Исрафил Мягьямедовдиз, табасаран алфавит дюзмиш гъапIу мярифатчи ва халкьдин мялим Темирхан Шалбузовдиз ядиграр яратмиш гъапIну.
«Исрафил Мягьямедовдиз ядигар гьязур апIуз теклиф гъапIиган, узу аьхю разивалиинди думу ляхин апIуз хъюгънийза…. Темирхан Шалбузовра гизаф лайикьлу инсан вуйи. Дугъу ихь чIалнан тафавутлувал гъюбхну, миллетдин зигьимлувалин рякъяр яркьу гъапIну. Узухьна илтIикIну, гьадму касдин сурат арайиз хувалик йиз пай кайивалиин гизаф шад вуза…Вари гьаму суратар Санкт-Петербургдин гьацIкьялаъ айи ич аьхю устаханайиъ арайиз духнайидар вуйиз. Гьадму ляхин вари йиз кIул’инди апIураза… Табасарандихъди, ихь халкьдихъди аьлакьалу фунуб месэла гьял апIбазра кюмек тувуз гьаммишан гьязур вуза», – гъапнийи ич сюгьбатнаъ Мирзабег Аьлимирзаевди.
Ватандин вакиларихьна, халкьдин тарихдихьна айи гьюрмат гъябкъиган, Мирзабег Аьлимирзаевдиз йисандин скульптор ччвур тувуз къарар адабгъунча.