Цци, декабрин вазлиъ, Хив райондин Хиварин гъулан агьали Зелимхан Пашаев кьюбпи ражари вуди пауэрлифтингдиан дюн’яйин чемпион гъахьну. Талитариъ табасаран пягьливни дахъну гъагъишин за апIбаан дюн’яйин цIийи рекорд дивну – дугъхьан 190 кг за апIуз гъабхьну. Му талитариъ Зелимхановди варихалкьарин дережайин спортдин устаддин нормативра тамам гъапIну.
Зелимхан Пашаевдин 22 йистIан дар. Амма думу гъийин йигъаз чан юкIв али спортдиан миржиб чIатху талитариъ иштирак гъахьну, ва варидариъ дугъу сабпи йишвар гъадагъну. Гьамусяаьт Зелимхан пауэрлифтингдиан Дагъустандин, Урусатдин Европайин ва кьюб ражари дюн’яйин чемпион ву.
Чан му заан натижйир табасаран бали тренер хътарди, талитарихьна кIул’инди гьязур шули, гъазанмиш гъапIну.