Ивановский областдин Наволоки шагьриъ бицIидарин артмиш’валин центрин 1-пи нумрайин бицIидарин багъдиъ лихури, ихь ватанагьли, Хив райондин ЦIудухъ гъул’ан вуйи Эсмира Гьяжимягьямедовайин 7-пи йис ву. Эсмирайин ляхин жара тербиячйиринубсиб дар. Дугъу бицIидарин багъдиз гъюрайи урус ва жара миллетарин баяр-шубариз Дагъустандин аьдатар улупури, дурар гьацира табасаран халкьдин культурайихъди ва саняаьткарваларихъди таниш апIура.
Чан тIалабниинди ктау бицIи дуркьар Дагъустандиан Ивановский областдиз хьади душну, дугъу багъдиъ айи бицIидариз, тербиячйириз ва бицIидарин абйир-бабаризра кмиди халачийихъ деуз, гугар китIуз, халачи убхуз улупну. Аьшкь айидариз дугъу халачи убхбан мастер-классар улупура. Дугъу учв лихурайи бицIидарин багъдиъ Кафари Кавказдин халкьарин аьдатарихъди ва культурайихъди таниш апIру программа юрутмиш апIура ва баяр-шубариз асас вуди дагъустан халкьарин, иллагьки табасаранарин культурайикан мялуматар тувра.
Багъри аьдатар ва халкьдин ирс уьбхювализ лигну, Эсмира Гьяжи-мягьямедова «Йисандин тербиячи» номинацияйиъ гъалиб гъахьну.
ЙИСАНДИН ТЕРБИЯЧИ
![](https://zoritabasarana.ru/wp-content/uploads/sites/13/sites/13/2023/12/esmira-urusatdin-bicz1idariz-tabasaran-adatar.jpg)