2023-пи йис Урусатдин Президентди чан къарарниинди машгьур шаир Расул Гьямзатов бабкан гъахьихъанмина 100 йис тамам хьпаз бахш гъапIнийи. Юбилейихъди аьлакьалу асас серенжемар Мягьячгъалайиъ, Дагъустандин гьарсаб райондиъ, гьарсаб гъулан мектебдиъ, Москвайиъ, Санкт-Петербургдиъ, Минскдиъ, Бакуйиъ, Ташкентдиъ кIули гъушнийи.
Къайд апIуб лазим вуки, «Табасарандин нурар» газатдира Р. Гьямзатовдикан макьалйир дикIури, юбилейин серенжемдик чан пайра кивнийи. Табасаран шаирар Ш.Шагьмардановди, Гь. Аьбдурягьмановди, С. Кюребеговайи авторвалин макьалйир гъидикIнийи.
2023-пи йисан табасаран халкьдин вакиларинра юбилеяр къайд гъапIнийи. Цци Ватандин тарихдиъ аку шил гъибту, бажаранлу шаир Юсуф Базутаев бабкан духьну 75 йис тамам гъабхьну. Хючна гъулаъ дугъан юбилейин серенжемариъ культурайин вакилар, дустар, багахьлуйир, гъарашугъар, журналистар иштирак гъахьнийи.
2023-пи йисан Урусатдин ва Дагъустандин искусствйирин лайикьлу гъуллугъчи, композитор Кьасум Мягьямедов бабкан духьну 80 йис тамам гъабхьну, ва му юбилейиз Табасаран райондиъ кIули гъубшу Республикайин «Рубасдин мукьмар» фестиваль бахш гъапIнийи.