14-пи августдиъ Мягьячгъалайиъ гъабхьи бедбахтвалин дюшюшну вари уьлкейин агьалйирин кIваз аьзаб тувну. Мягьячгъалайин автосервисдиъ цIа кабхъувалиан тIуркIувалар арайиз дуфну, 600 квадратдин метр кьадар йишвак цIа кабхъну гъубгнийи.

Думу бедбахтвалин натижайиъ 38 кас гъийихну ва 119-илан зина агьалйириз зийнар гъахьну. Гъийихдарин арайиъ шубур бицIирра а. Мидланра гъайри, инсанаризси, АЗС-дин багарихь дуланмиш шулайи хайлин инсанарин хуларизра зарар гъабхьну. Дицдар хуларин кьадар 40-кьан ву.

Республикайин улихь-кIулихь хьайидари, республикайин бюджетдиан му завалиан зийнар духьну гъийиху касарин гьарсаб хизандиз 1 миллион манат, зийнар гъахьидариз 400 агъзур ва пучIу зийнар гъахьидариз 200 агъзур манатдин кюмекар гъапIну. Гьаддихъди сабпи, республикайин рягьимлувалин фондарианра дурариз хайлин кюмек тувну.

Пашманвалин му дюшюш арайиз гъюбан сабпи себеб – шагьур тикмиш апIбан къайдйир чIур апIувал ву, фицики газдин АЗС инсанар яшамиш шлу хуларихьан ва жара дараматарихьан 35 метр манзилнаъ ерлешмиш дубхьну ккунду. Хъа кьюб гъапиб, АЗС хъайи йишвхьан 50 метрин манзилнаъ 100 тоннайин селитра айи склад ади гъабхьну. Гьадму селитрайик цIа кабхъну тIубкIувалин кьувват 35 тоннайин тротил тубкIувализ барабар вуйи.

ТIубкIувал арайиз гъюбан кьяляхъ, кьюд йигълан селитрайин эйси дидисну, Москвайин СИЗО-йиъ итну. Гьаддихъанмина гъийин йигъазкьан му вакьикьайин гьякьнаан силис гъябгъюри ими.