Мейлан Нежефов
Дагъустан Республикайиъ ктабхъурайи йисан 350 йитим гьюкуматдин терефнаан хулар гъадагъуз пулин сертификатарихъди тямин дапIну ккунивалин къарар адабгъна.

 

Му аьгьвалатнан гьякьнаан Хив райондиъ фицдар хабрар аш ва улупнайи сиягьназ райондиан дахил шулайидар аш аьгъю апIури, узу райондин опекайлин ва попечительствойин органдин пишекар Табир Темирхановдихьна илтIикIнийза.

«Гъийин йигъаз ихь райондиъ хулар тувбан нубатназ ва кюмекназ ккилигурайи йитимарин кьадар 28 кас ву. Узлан ва администрацияйилан асиллу вуйи дурарин сиягь ва лазим вуйи вари кIажар республикайин меркездиз вахтниинди хътаури ва фу вуш-дарш ахтармиш апIури, гьаммишан гъайгъушнаъ аза.
Йитимарин улупнайи кьадарнакан гъи 20-25 йис тамам гъабхьидар райондиъ учетдиъ имишра, дурар яшамиш шули шагьрариъ а. Дурарихъдира зенгар апIури, сигъ аьлакьайиъ ача. Гьаци, узуз айи мялуматариинди, хуларихъди вуйи месэла шубур касдин гьаму йис ктабхъайиз гьял хьибди кIури, гаф тувна.
Эгер юкьуб вазлин арайиъ чпин хилиъ айи сертификат ишайиъ апIуз чарйир дагну, вахтниинди ликар алдагъиш, дурариз саб манигъвалра алабхъидар ва хулан эйсйир хьиди. Хъа эгер кьан гъабхьиш, икибаштIан, сертификат РД-йин минстройдиз кьяляхъ гъябгъиди. Сертификатдиъ улупнайи дакьатарра кьюб миллионна шубудварж агъзур манаттIан дар. Хъа гъи Дагъустандиъ гьаму пулихъ хал гъадабгъубра гизаф читин ляхин ву.

ЦIийи йис узу зиихъ къайд гъапIу шубрид касари цIийи хулариъ къаршуламиш апIур кIури, хъугъуз ккундузуз» – гъапнийи Табир Темирхановди.