Зубайдат Шябанова

Гьаму йигъари Табасаран райондин глава Мягьямед Къурбановдин табшуругъниинди дугъан заместитель Заур Мусаев, деъру хулариз нубатнахъ дийигънайи 23 йистIан артухъ яшар духьнайи йитимарихъди ва дурарин багахьлуйирихъди гюрюшмиш гъахьну.

 

Гюрюшдиъ Заур Мусаевди къайд гъапIганси, йитимари хулар масу гъадагъуз пулин сертификатар жара апIбан гьякьнаан къарар кьабул дапIну швнуд-сад йис ву.

«Улихьна йисари йитимариз яшамиш шлу хал тендерарилантина муниципалитетдин аьтрафариин масу гъадабгъури гъахьнийи. Гьамус къайда дигиш гъапIну. Хулар масу гъадагъуз РД-йин минстройи гьаму йисан 2 миллионна 705 манатдин сертификат жара апIура. Думу кьадарниин аьлава дакьатар иливну, йитимарихьан Урусатдин фунуб ккунш региондиъ хал масу гъадабгъуз шулу», –гъапнийи Заур Мусаевди.

Дугъу гьацира уч духьнайи йитимарин суалариз кьатI’и жавабар тувну, дурар сертификат гъадабгъбаъ фицдар кагъзар лазим вуш ва аьрза фици абцIруш, гъаврикк ккаъну. Аьрза бикIурайири уьлкейиъ улупнайи асккан гьисабтIан цIибди маважиб гъадабгъуради ккундар ва, гьацира журумарихьан, уголовный жавабдарвалихьан марцциди ади ккунду.

КIваин апIурача гъубшу йисан Табасаран райондиан 8 йитимди хуларин сертификатар гъадагъну. Гьаму йисанра 8 йитимриз сертификатар жара апIуз планарик кипна.