Зубайдат Шябанова

Табасаран райондиъ муниципалитетдин туризмдин циркил артмиш апIурайи варитIан важиблу ядиграрикан саб вуйи Ургур ччвуччвун ва сар чуччун гъалайихъна гъюру рякъ рас гъапIну.

 

Хючна гъулаъ гъалайихьна гъябгъру рякъ’ин асфальт улубзувал «Йиз Дагъустан – Йиз Рякъяр» проектдик кипнайиб вуйи, думу рякъ Табасаран райондин 95-йисандин юбилейин серенжемарихьна гьязурвалар гъахурайи программайин дахилнаъди рас гъапIуб ву.

Муниципалитетдин кIулиъ айи Мягьямед Къурбановдин гафариинди, думу рякъюн манзил гьацI километртIан артухъ ву. Думу манзилнаъ асфальт улубзру ляхнариз райондин транспортдилан уч гъапIу налогарин дакьатариан 5 миллион манат харж удубчIвну.
Гъалайихьна гъягъру рякъюн 50 йистIан артухъ ву. Думу швнуб-сабан рас гъапIуб ву. Амма вахт гъябгъбахъ рякъ пуч гъабхьну. Гьаддиз райондин кIулиъ айидари думу рякъ’ин асфальт улубзбан къарар адабгънийи.

«Ихь райцентри учIвру йишвахь дагъдиин али гъалайи ихь халкьдин тарихи ирс ва девлетлу культурайин сурат улупура. Райондиъ гъягъру жямяаьтлугъ серенжемар саки вари ухьу гьаму гъалайин аьтрафариин гъахурахьа. Гьаму йисанра душв’ин райондин юбилей къайд апIбан серенжемар гъахиди. Гьадиз гъахурайи ляхнар асас гюзчиваликк кка. Асфальт улубзбан кьяляхъ думу рякъди гъягъюз гъулайди хьибди», – гъапнийи Мягьямед Къурбановди.

Къайд дапIну ккундуки, йислан йисаз райондиз гъюрайи туристарин кьадарра артухъ шула. Кюгьне Дербент шагьур багахьди ерлемиш дубхьнайивалира чан роль уйнамиш апIуру. Гьаддиз туризмдин циркил артмиш апIури, райондиъ деврин тIалабариз жаваб тувру инфраструктура арайиз хуз рякъяр дагну ккунду.