Мейлан Неджефов
1995-пи йисхъанмина ихь уьлкейиъ 12-пи июнди Урусатдин Йигъ къайд апIура.
Му машквраз тялукь вуди, Хив райондиъ саб жерге серенжемар кIули гъухну. Cифте, машквраз йигъар ккимиди, райондин администрацияйин вари идарйирин иштирак’валиинди аьхю субботник кIули гъубшнийи. Хъасин бицIидарин багъариъ ва культурайин хулариъ «Урусатдин унчIвар» акция гъубхнийи ва «Йиз Урусат» ччвур тувнайи конкурсдиз шиклар зигбаан, цалин газатар каъбаан, шиърар урхбаан ва гьацира спортдиан талитар гъухнийи. Вафалувалиинди лихури, ихь уьлке улихь гъабхбаз, Ватандин ва багъри халкьдин ад за апIбаз чпин уьмур сарф гъапIу Владимир Лениндиз, Иосиф Сталиндиз, Темирхан Шалбузовдиз ва Манаф Шамхаловдиз бахш дапIнайи ядиграрихъ кюкйир дивну, райондин улихь-кIулихь хьайидари, аргъаж шулайи наслар дурарин ирснахъди таниш апIури, дурар ухьуз аьсрариинди нумунади гъузрубдикан ктибтнийи.
Аьхиримжи серенжем РКДЦ-йин гьяятдиъ кIули гъубшнийи. Райондин главайин заместитель Мирзабег Багъичевди, агьалйириз машквар тебрик апIури, гъапи: «Гьюрматлу дустар! Марцци кIваан учвуз Урусатдин йигъандин машквар тебрик апIураза! Гьарсар касдиз жандин сагъ’вал, хизандин хушбахтвал ва Урусат хъана адлу апIуз жвуван пишекарвалин рякъюъ заан хъуркьувалар, ужудар сяътар ва ислягьвал ккун апIураза. Урусатдихьна вуйи ккунивалик гьарсар касдихьан чан хусуси пай кивуз шулу. Ухькан гьарсари думу чан ккунивал намуслувалиинди жвуван гъянаъ уьбхюрайибра аьгъязуз. Думу ихь абйирин тербияйин натижа вуйиб гъи ихь уьлкейиз чарасуз лазим гъабхьи вахтна райондин варжариинди вуйи кьягьялари Украинайиъ гъабхурайи спецоперацияйиъ улупурайи гьунарарира субут апIура. Гьамцдар машквран йигъар хъанара къайд апIруси, дурар гъалибвал хьади жвуван ватандиз багахьлуйирихьна хъадакну ичри. «Йиз уьлке ву йиз Урусат» — пагь фукьан такабурди ебхьурадарин! Ихь ругариин инсандин яшайиш илимбукьан гагьди, Урусатдихьна вуйи мициб ккунивал ихь дамарариъ гьаргандиз либхури гъубзди».
Му йигъан 14 йис тамам гъабхьи живанарин хилиъ паспортарра ивнийи. Гъит дурариз ватанпервервалин гьиссариинди Урусатдин паспортдин лайикьлу эйсивал апIуз кьувват туври.
Серенжемдин программа райондин культурайин работникари чпин концертдин нумрариинди аьхирихъна гъабхнийи.
