Гюльнара Мягьямедова

13-пи январи Урусатдин Федерацияйиъ махлукьатлу дакьатарин ва улупнайи къайдайиинди удучIвурайи газатарин ва журналарин гъуллугъчйирин пишекарвалин машквар – Урусатдин чап апIбарин йигъ къайд гъапIну. Думу машквар, гьар йисанси, гьаму йисанра редакторари, журналистари, мухбирари, типографйириъ лихурайидари, журналистикайин факультетариъ урхурайи судентари ва душвариъ лихурайи мялимари къайд гъапIну.

 

Машквран йигъ тяйин апIбакан улхуруш, думу йигъ 1703-пи йисан 13-пи январи Петр Сарпирин указдиинди Урусатдиъ «Ведомости» кIуру сабпи газат адабгъбахъди аьлакьалу дапIна. Петр I-пири газатдиз тувру материалар чав гъядягъюри, ахтармиш апIури, гъалатIар ктагъури гъахьну.

Чап апIбарин гъуллугъчйирин пишекарвалин йигъ Дагъустан Республикайиъра къайд гъапIну. Махлукьатлу хабрарин дакьатарин вакилар пишекарвалин машкврахъди региондин кIулиъ айи Сергей Меликовди, правительствойин председатель Аьбдулмуслим Аьбдулмуслимовди, мялуматарин ва чап апIбарин агентствойин кIулиъ айи Арсен Юсуповди тебрик гъапIну.

14-пи январи Мягьячгъалайиъ Журналистарин хулаъ прессайин машквраз республикайин СМИ-йин вакилар уч гъахьну. Серенжем Урусатдин журналистарин Союздин Дагъустандин региондин отделениейи тешкил дапIнайи.

Уч духьнайидарин улихь удучIвну гъулху журналистарин ерли отделениейин председатель Мягьямад Ибрагьимовди журналистариз айи гъийин читинваларикан, газатар-журналар урхрударихъди уьрхюрайи аьлакьйирикан, журналистарин кюмекниинди республикайин ад за шулайиваликан гъапнийи.
Серенжемдиъ Журналистарин союздин, региондин министерствйирин ва идарйирин терефнаан республикайин СМИ-йин ужударсдар вакилариз наградйир, гьюрматнан грамотйир, чухсагъул мялум апIру кагъзар тувну.

Душваъ гьацира республикайин журналистарин «Дагъустандин 2025-пи йисандин гъизилин перо» премияйин лауреатарра ктагъну. Юкьуб номинацияйиъ гъалиб гъахьидариз дипломар, пулин пешкешар тувну.