Мейлан Нежефов
Аьхиримжи йисари меценатарин, жягьтлу касарин ва рягьимлувалин фондарин кюмекниинди ихь гъулариъ ужувлахъинди аьхю дигиш’валар шулайибдин ухьу шагьидар вухьа.
Гьаци Хив райондин ЧIир’арин гъулан имам Абубакар Нурмягьямедов улихь гьучIвну, вари гъулан агьалйири накьварилан сетка йивуз къарар адабгънийи. Гьяфтайин арайиъ 570 агъзур манат пул уч гъабхьнийи. Абубакари узуз туву мялуматариинди, гъулан агьалйиринси, гъирагъ-бужагъдиланра му ляхнин кюмекназ бакар гъахьидарин кьадарра цIиб дайи.
«Ич дих гъеебхьиган, гъулаъ яшамиш шулайи агьалйирси, саб филан-вуш гъул’ан удучIвну душнайи касари ва, му сувабнан ляхин ву кIури, ихь райондин гъуларианра кюмек тувдар гизаф гъахьнийи. ИкибаштIан, cадакьайин аьхюб-бицIиб айиб дар, думу абхърайи йишвакк ккудубкьру гъуси гьисабнак ву. Гъит гьарсар касдин аьбаси Аллагьу Тяаьлайи кьабул апIри. Чпин гъазанмиш апIру жанариз мюгькам сагъ’вал туври ва хал-хизандин улихь дугъубжври. Ав, мал-къарайихьан, пеэр-шюхъярихьан накьварин марццишин уьбхюз чара абгуз кьанди вушра амур гъапIунчуз. Дугъриданна, гьич хиял дайиз, гьяфтайин арайиъ мициб гужал кюмек шул пну. Шюкюр ибшри Аллагьдиз!
Накьварилан сетка йивру манзил, цIиб-аьхюб камди, агъзур метркьан вуйи. Гьарсаб рулондиин 10 метр ярхишин алди, 100 рулон сетка ва сеткайихъди урсуз 2 метрна 20 см ярхишин алди 500 рукьан турбйир гъадагъунча. 2024-пи йисандин июндин 4 гъапи йигъ ич гъулан тарихдин сиягьназ гъябгъиди. Фицики му йигъан, бисми дапIну, му рягьимлу ляхнихъ хъюгъюнча. Аллагьдин амриан гьавйири манигъвал тутрувиш, сифте цементдин растворихъди турбйир итну, хъасин, сетка кибтIну, гьаму гъябгъюрайи гьяфтайи му ляхин кIулиз адабгъидича. Пулин дакьатар гьуркIри ачуз. Суткайин 24 сяаьтнан арайиъ гьарган йиз зенгниин али ва варибдин улихь узухъди хъайи Авчихан Зульфикьаровдиз, Алаутдин Римихановдиз, Муса Жамаловдиз, Саид Аьлиэмсетовдиз, Тагьир ва Закир Хамирзаевариз, Хайирбег ва Сейидгьясан Хайирбеговариз марцци кIваан аферин кIураза. Гьелбетда, варидарин ччвурар ктухуз даршул, хил алдабгъай. Хъана, кIулиъ дурар ади, варидариз аферин!»
