Мейлан Нежефов

Мялум вуйиганси, мектебдиз гьаърайи веледдиз гъи саб жар палатна дарсарихьна чарасуз лазим вуйи алатар гъадагъбаз асккан кIул 25-30 агъзур манат пул лазим ву. Хъа вари абйир-бабариан, иллагьки кьюр-шубур велед урхуз гьаъруган, му удукьру ляхинра дар.

 

Ццийин урхбан йисан Хив райондин мектебариъ 2105 касди аьгъювалар гъадагъиди. Дурарин арайиъ мектебдиз сабпи ражари вуди гамар алдагъурайи 187 бицIирра а.
Шюкюр ибшри Аллагьдиз, гъийин йигъан жумартвалиинди кюмекназ бакар шули хил гьачIабккурайи агьалйирра а. Сабпи классдиз гъягъюрайи баяр-шубариз дурари сумкйир, китабар, шиклар зигру альбомар, дафтрар, ручкйир ва кьалмар хътауб аьдатнаъ абхъна. Кьюр бай СВО-йиъ иштирак шулайи Наида Ибрагьимова, ватандашариз кьанди вушра чухсагъул пуз ккунди, узухьна илтIикIнийи.

«Ихь райондиан мобилизацияйин дахилнаъди дявдиъ иштирак шулайи абйирин 46 бицIириз пешкешар туву бизнесмен ва меценат Балакерим Мягьямадовдиз, райондин сабпи классдиз гъягъюрайи саки вари бицIидариз табиаьтдикан классдин гъирагъдиъ урхбан китабар багъиш гъапIу ДГПУ-йин ректор Нариман Асваровдиз, райондиъ ерлешмиш дубхьнайи «Инсан» фондназ, гьацира, кIулди ихь мектебдиз гъюрайи йицIур касдиз пешкешар хътау гъулан агьалйир вуйи Госдумайин депутатдин кюмекчи Сиражудин Гьяжимягьямадовдиз ва Дербент шагьрин 18-пи нумрайин мектебдин директор Низами Юзбеговдиз аферин. Валлагьи, йиз баяриз мектебдиз гъягъюрайи чпин веледарин шиклар йивну, флану касди хъадаънайи пешкешар ву пну, узу ихтилат гъапIган, дурарин чпи дявдиъ айиб кIваълан гьархнийи. Гьадмукьан рази гъахьнийи. Къайд апIуз ккундузузки, чпихьна вуйи гьюрмат, сабвал, чпи кIваълан душну адрувал кьягьялари нубатнан ражари гьисс гъапIнийи. Кюмекнан хил гьачIабкку ватанперверариз мюгькам сагъ’вал тувричпиз. Сабпи классдиз гъягъюрайи бицIидарира хъуркьувалариинди урхур пну, миж кивраза», – гъапнийи игитарин дадайи.