Гюльнара Мягьямедова
Дагъустандиъ чпин хушниинди СВО-йиз гъягъюз гьязур вуйидарикан тешкил апIурайи «Каспий» батальон арайиз дубхну ккудубкIну. Дидин гьякьнаан 27-пи октябриъ батальондин командир Виталий Наумочкинди «Дагъустан» РИА-йин конференцйир гъахру залиъ республикайин СМИ-йин вакиларихъди вуйи гюрюшдиъ мялумат тувнийи.
Пресс-конференцияйиъ гьацира командирин дявдинна политикайин ляхин гъабхру заместитель Рягьим Нурмуханов, ротйирин командирар вуйи Гьябибулла Халилов ва Мягьямед Бягьямаев иштирак гъахьнийи.
Василий Наумочкиндин гафариинди, батальон ва республикайин жямяаьтлугъ тешкилатарин жягьтлувалиинди Дагъустандин Глава Сергей Меликовди дурарин тереф бисувалиинди арайиз гъабхнийи. Саб вазна гьацIан арайиъ 230 касдикан ибарат вуйи батальон тешкил гъапIнийи. 30-пи октябриъ батальон военный гьязурлугвалар гъахру ва аьгъювалар тувру лагериз гъягъбанди вуйи. Душваъ гьяракатниинди кивру курсар дурхну, батальондин эскрар хусуси метлеб айи дявдин операция гъабхурайи йишваз гъягъиди.
«Батальондин дахилнаъ Дагъустандин вари районарин вакилар а. Чпин хушниинди батальондиъ гъуллугъ апIуз дуфнайидарикан варитIан жигьилурин 21 йис, хъа варитIан яшлуйин 64 йис ву. Гьаму 230 касдикан 20 процентдиз СВО-йиъ иштирак хьувалин тажруба а. Му десте дишлади СВО-йиз гъягъюз гьязурди айиб вушра, дидин дахилнаъ военный ляхнихъди таниш дару жигьиларра а. Учуз лап жигьил баяр батальондиз кьабул апIуз ккунди адайчуз, амма ихь жигьиларин ватанпервервали учу мажбур гъапIну. Ич метлеб улихь диву месэлйир тамам дапIну, сагъ-саламатди баяр кьяляхъ гъювал ву», – гъапнийи Василий Наумочкинди.
«Каспий» батальондин дахилнаъди СВО-йиз гъягъюрайидарин гьарурин чан метлеб а. Мисал вуди батальондин командирин дявдинна политикайин ляхин гъабхру заместитель Рягьим Нурмуханов гъадагъиш, дугъан чве гъубшу йисан СВО-йин женгариъ кечмиш гъахьну.
«Батальондин дахилназ гъадагънайидарихьан гьацI йисазди, миржиб вазлизди, сад йисазди контракт йибтIуз шулу. Дурариз СВО-йиъ айи контрактникариз ва мобилизация дапIнайи ватандашариз туврубкьан маважиб (210 агъзур манат) ва яшайишдин кюмекар тувру», – гъапнийи Рягьим Нурмухановди.
Чан хушниинди батальондиз дуфнайи Арсен Ягь’яевдин гафариинди, батальон тешкил апIурайиваликан гъеебхьубси, дугъу, дуфну, аьрза гъибикIну. Думу 1999-пи йисан Дагъустандиъ гъачагъар архьу вахтна гъахьи дявдин женгарин иштиракчи ву.
Арсен Ягь’яевдихъди сабси батальондиз дугъан чвуччвун байра дуфна. Журналистари Арсен Ягь’яевдихьан, гьамциб къарар кьабул гъапIган, дугъан хизанари фу гъапнуш, гьерхнийи. «Хизанари фу кIурухъа? Йиз хпиризра узухъди «Каспий» батальондиз гъюз ккун гъабхьнийи. Гуж-балайиинди кьяляхъ гъапIунза», – инчI кади гъапнийи Арсен Ягь’яевди.
Батальондин командири журналистарихъди вуйи гюрюшдин аьхириъ къайд гъапIганси, батальон арайиз хруган, чпин хушниинди гъюрайидарин хизанарикан жюрбежюр мялуматар уч апIбаан хайлин ляхин дубхна. Республикайин гьюкмари СВО-йин зонайиз гъушу эскрарин хизанариз лазим вуйи кюмекар тувбан ляхин тешкил апIиди.
