Наргиз Гюлечова

10-пи октябриъ Каспийск шагьриъ айи аьхю мяракйир гъахру «Аль Кавсар» кIуру залиъ, ихь гъуларианра хайлин инсанар дуфну, Мягьячгъалайиъ ва Каспийскдиъ яшамиш шулайи табасаранарин мевлюд кIули гъубхну.

 

Думу мажлис гирами пайгъамбар бабкан гъахьи «Раби уль-Авваль» вазлиз бахш дапIнайиб вуйи. Сувабнан серенжемдиъ Табасаран ва Хив районарин имамарин Советарин председателар Ансар Рамазанов, Шябан Салигьов ва 500-дихьнакьан инсанар иштирак гъахьнийи. Мидланра гъайри, серенжемдиз гьюрматлу хяларра дуфнайи. Гьадрарин арайиъ Йемен гьюкуматдиан вуйи Кьур’ан вари кIваъланди аьгъю гьяфис Ибрагьим Агьмад аз-Зубаджи ва дугъан бай Муътаз, Каспийск шагьрин имамдин заместитель Мюгьяммед Абасов, душваъ табасаранарин хайир-шейир кIулиъ гъабхурайи Халитдин Рамазанов, Нажмудин Нурмягьямедов, Уьсман Шябанов, Аьбдурягьман Аьдилов ва хъанара жара касарра айи.

Серенжемдин тешкилатчи Ансар Рамазановди туву мялуматариинди, мажлиснан хусуси пайнаъ удучIвну гъулхдари пайгъамбрин уьмрикан, ихь халкьдин яшайишдикан ктибтну ва ухьу пайгъамбрин фициб нумуна дибисну, гьаддихъди душну ккундуш, аьян гъапIну. Гьацира уч духьнайидари гъийин йигъан читин гьялнаъ айи мусурмнарихъан, Украинайин аьтрафариин хусуси метлеб айи дявдин операцияйиъ иштирак шулайи ихь ватанагьлийирихъан, Аллагьу Тяаьлайихьна илтIикIну, дурар сагъ саламатди гъузуз ва дюн’я ислягь хьуз дюаь гъапIну.

Мевлюднан кьяляхъ залиъ мажлисдиъ иштирак духьнайи табасаран дишагьлийир кIул’инди гъузну, дурари гирами пайгьамбриз салават урхбиинди мажлис аьхирихъна гъафну.