Тажутдин ТIагьиров

Узура хялижвди гъушур вуйза, узухьнара гъюри шуйи. Саб ражари гьаци хялижвди гъягъбан гьякьнаан учухьна гъафи ич эмейин жилир ТIюргъярин Кьасум халуйи гьамциб насигьят тувнийзуз:

– Ичв гъул’ан жара гъулаз хялижвди гъягъруган, жибдиъ пул адарди мигъибтан, хулаъ пул адарш, гъуншдихьан бурж апIин.
– Дици гьаз гъапива? гьерхза узу, — хялижвди гъушуриз пул гьаз герек хьибди?
– Пул хьадарди гъушиш, ич гъула Балажайиин улубкьуб улубкьурвуин.
– Дугъ’ин фу улубкьну?
– Фу улубкьнуш, хъебехъ. 1954-пи йисан Гуми гъулаъ ТIюргъярин Вейс пягьливан илитну ади шулу. Дидкан чаз хабар гьабхьиган, Халгъарин халачйирин аьртилин председателин заместителди лихурайи Гьяжиев Гьяжи (Балажа) Гумиз гъягъюру. Думу ЯрфунтIилан асина гъулазди гъюри гъяркъган, ччвурар йитIуз туврайи Аьбдулкеримди гъямпIлиз Балажайин ччвур кIуру. ГъямпIлира дишлади чIигъ aпlypy:
– Му гьунар гьунарназ ибшри, хъа гьамус aпIpy ялхъван пягьливан Гьяжиев Гьяжийиз бахш апIуб ккун апIурача.
– Леппе, жан юлдаш, беле башиста! – дупну, пягьливан тIилиин жвукь йивру ялхъван апIуз хъюгъру.
Гьаму арайиъ гъямпI Балажа-йихьна, шабаш ча, кIури, жаргъуру. Балажа русвагь шулу. Дугъахь саб кепегкьан хьадайи. Хъа ччвур гъийибтIган, шабаш дарапIди гъибтуб аьйиб вуйи.
Гьамус гьапIрува? Жара чара дибрихъу Балажайи, гъултгъихъан бикIру книжка хъадабгъну, дидик, фулан пягьливниз, зарплата гъадабгъган, йицIихьуб манат тувуз буржлу вуза, кIуру расписка дибикIну, гъямпIлихьна тувну.
Кьасум халуйи кьюбсана насигьят тувнийзуз.
Увуз гъач кIуру теклиф гъабхьиш, гаш фун хьади хул’ан муудучIван. Гьаз гъапиш, душваъ, белки, яв улихьна ипIруб кьанди хур, белки, дархиди гъибтур. Дидкан яв сагъвализ манигъвал дарибшри.
Кьюбпи насигьят гьамциб вуйи – яв мусурманвал улупбан бадали, гъудгнар апIин, ушвар дис. Думу ляхникан инсандин сагъвализра аьхю мянфяаьт а.

«Гуми гъул – багъри гъул»
китабдиан, 71-пи маш.