Гюльнара Мягьямедова
Москвайиъ Вариурусатдин китабарин «Уьру майдан» ччвур тувнайи 10-пи фестиваль ачмиш гъабхьну. Думу ихь уьлкейин китабарин цирклиъ гъахру аьхю серенжемарикан саб ву.

Дагъустан Республика китабарин думу фестивалин гьаргандин иштиракчи ву. Региондин стенд ва программайин серенжемар Москвайин агьалйириз ва меркездин хялариз гизаф кьабулди шулу. Гьаму йисан фестивализ Дагъустан Республикайин «Эпоха» ва «Дагъустан» чапханйири Дагъустандин халкьдин шаир СтIал Сулейман бабкан духьну 155 йис хьпаз бахш дапIнайи проект дубхна.

Фестиваль ачмиш апIбан шадлугъариъ РД-йин мялуматарин ва чап апIбарин агентствойин кIулиъ айи Аьбдуризакь Жамалудинов иштирак гъахьну. «Дагъустандин машгьур шаир СтIал Сулеймандиз бахш вуйи ич серенжемдиз гъюбаз варидариз чухсагъул мялум апIураза. Ккудубшу 2022-пи йисан Фазу Аьлиевайин, гъубшу 2023-пи йисан Расул Гьямзатовдин юбилеяр къайд гъапIунхьа, гьаму йисан СтIал Сулеймандин вахт дуфна. Йиз фикриинди, гьаму машгьур ччвурариин дийигъидархьа, юбилеяр къайд апIбан аьдат давам апIидихьа», – гъапнийи Аьбдуризакь Жамалудиновди.
«Дагъустан» чапханайин кIулиъ айи Уьмаруьсман Гьяжиевра СтIал Сулеймандиз бахш дапIнайи серенжемдиз уч духьнайидарин улихь удучIвну гъулхну. «Гъи СтIал Сулеймандикан гафар апIуз вахт улубкьна. Йиз фикриинди, халкьдин шаирин юбилейиз бахш вуди гъуху асас серенжемарикан саб — дугъан китабар чапдиан адауб ву. Ихь метлеб Дагъустандин культура, гьадму гьисабнаъди поэзияра, дидихъ юкIв хъайидарихьна рубкьуб ву», –къайд гъапIну Уь. Гьяжиевди.
Серенжем гъабхурайи аьлим-физик ва жямяаьтлугъ кас Низами Аьбдулгьямидовди 1934-пи йисан СтIал Сулейман Москвайиз Советарин Союздин писателарин сабпи съезддиз гъюваликан ктибтнийи. «СтIал Сулеймандиин дагълу палат алди гъабхьну. Думу Москвайиъ, Уьру майдандиин ва ГУМ-диъ гъилицнийи. Литфондди дугъаз палтар гъадагъуз 3 агъзур манат тувуз къарар адабгънийи. Думу вахтари 3 агъзур манат аьхю пул вуди гъабхьну», — ктибтнийи Низами Аьбдулгьямидовди.