Гюльнара Мягьямедова
Магьа цIийи урхбан йис кебгъну саб гьяфтара гъубшну. Амма мектебдиз гъягъюрайи бицIидарин абйир-бабар, чпин веледариз лазим вуйи китабар агури базрариъ, туканариъ лицури ими. Китабар гьуркIри адрувалин месэла журналистаринра кIваълан дубшнадар. Гъюру гьяфтайиъ «Дагъустан» РИА-йиъ РД-йин образованиейин ва илимдин министр Ягь’я Бучаев журналистарихъди гюрюшмиш хьпанди ву. Душваъ учу му месэла сабсана ражари гъитIибккидича.
6-пи сентябриъ региондин идара апIбан Центриъ Дагъустандин мектебариъ китабар гьуркIри адрувалин месэла республикайин образованиейин ва илимдин министр Ягь’я Бучаевдихъди гьял гъапIну. Министерствойин кIулиъ айири китабар гьуркIри адрувалин себебарикан ва месэла гьял апIуз агурайи рякъярикан мялуматар тувнийи.
Ягь’я Бучаевдин гафариинди, месэла мектебар китабарихъди тямин апIбан бадали, пулин дакьатар гьуркIри адрувалихъди аьлакьалу ву. Амма гьаци вуйивализ дилигди, республикайин бюджетди жюрбежюр мумкинвалар агура.
Министри къайд гъаIганси, мектебариъ урхурайи бицIидарин кьадар артухъ хьувалра китабар гьуркIри адрувалин саб себеб ву. Эгер 2022/2023-пи урхбан йисан Дагъустандиъ мектебдиз гъягъру бицIидарин кьадар 469 агъзур кас вуйиш, 2023/2024-пи урхбан йисан бицIидарин кьадар саки 480 агъзуриина удубчIвна. Мектебдиз гъягъюрайи сар бицIириз китабар гъадагъбан бадали 10 агъзур манаткьан лазим ву.
Мидланра савайи, улихьна ишлетмиш апIуз ихтияр тувнайи федеральный сиягьнаъ айи китабар, гьамус думу сиягьнаъ имдар. Гьар йисан федеральный сиягьнаан адаурайи китабар гьюдюхбан бадали, региондин бюджетдиан 1,5 миллиард манатдиина пул лазим ву», – гъапнийи Ягь’я Бучаевди.
Министрин гафариинди, РФ-дин Президентдин табшуругъниинди тартиб апIурайи варидариз сабсдар китабари айи аьгьвалат гьял апIуз кюмек тувди, амма цIийи китабарихъди лихуз хъюгъиган, улихьна гъадагънайи китабар ишлетмиш’валиан адаиди.
«Гьамусяаьт варидариз сабсдар китабарин федеральный линейка тартиб апIура, дурарикан сабпидар ухьуз дяркьнахьуз: 10-11-пи классариз вуйи Урусатдин тарихдин китабар (шиклиъ). Авторвалин ихтиярар Урусатдин Федерацияйин дахилнаъ а. Федеральный китабар удучIвубси, улихьна гъадагънайи китабар гъитну, цIийидар гъадагъуз мажбур хьидихьа. Диди республикайин бюджетдикан аьхю кьадар дакьатар ккун апIура», – гъапну Ягь’я Бучаевди.
Федеральный саб жюрейин китабар адагъбан кьяляхъ, Дагъустандин Правительствойи республикайин мектебар яваш-явашди китабарихъди тямин апIуз хъюгъди.
