Наргиз Гюлечова
Мягьячгъалайиъ ерлешмиш дубхьнайи Халкьарин художествойин сяняаьткарваларин центриъ Дагъустандин туризмдинна халкьарин художествойин сяняаьткарваларин министр Эмин Мерданов республикайин журналистарихъди гюрюшмиш гъахьну.
Министрин пресс-конференция улихьнаси Москвайиъ кIули гъубшну туризмдинна хялар кьабул апIбан индустрияйин Варихалкьарин «MITT-2025» выставкайиз бахш дапIнайиб вуйи.
Эмин Мердановди гъапиганси, Урусатдин му чIатху выставкайиъ Дагъустан иштирак шули, цци магьа хъади-хъади 4-пи йис ву, ва ихь республика Дагъустан выставкайин стратегияйин партнер вуди.
«Выставка кIули гъубшу йигъари Дагъустанди гьязур дапIнайи стенддиз лигуз 16 агъзур кас гъафну. Серенжемдин тешкилатчйирира ихь министерствойин выставкайихьна вуйи заан дережайин гьязурлугваликан ва дина духнайи экспозицйирин гьякьнаан гъапнийи.
Гьацира пуз ккундузузки, туризмдихъди ляхин гъабхури, циркил артмиш апIурайи 34 гьюкуматдиан 1 агъзуртIан артухъ иштиракчйир айи выставкайиъ Дагъустан Республика «Учв ужуди улупу Урусатдин регион» номинацияйиъ гъалиб гъабхьну.
ИкибаштIан, му выставкайихьна йисандин арайиъ гьязур шулача. Ихь региондиъ туризм армиш апIбан бадали, жара йишвариан вуйи туроператорарихъди йикьрар йитIуз ва Дагъустандиз туристар жалб апIуз, «MITT-2025» варитIан ужуб майдан ву», – гъапну министри.
Пресс-конференцияйиз уч духьнайи журналистари министриз суалар тувнийи. Табасаран райондиъ халачйирин фестиваль гъабхбан гьякьнаан узура Эмин Мердановдиз суал хъипнийза. «Гьар йисаз вуйи серенжемарин план тартиб апIруган, учу асас вуди, яркьу серенжемар гъахуб улупури шулуча. Янаки аьхю серенжемариз асас фикир тувруси, жвилли серенжемар гизаф гъахурадарча. Гьаци, гьар йисан республикайиъ «Ачухъ Дагъустан» аьхю форум, халкьарин художествойин сяняаьткарваларин фестиваль кIули гъабхурача.
Гьадму фестивалин дахилнаъди халачйир ва республикайин вари районариан халкьарин художествойин сяняаьткарваларин жара шей’арра улупура.
Ухьу серенжемар яркьу апIурайи вахтна, кIул’инди саб халачйирин фестиваль гъабхуб ухшар дар. Фицики, ихь метлеб серенжемар яркьу ва иштиракчйир артухъ апIуб вуйихь», — аьлава гъапIну министри.
