Мейлан Нежефов
Ислягь уьмур хъапIрайи Дашдемир ва Зарема Гьяшимоварин хизан, кьюркьлин цIа кубкIганси, гъамлу дердну кабаб гъапIну. Ихь уьлкейи миллетчйирихъди гъахурайи женгариъ мурарин шубур шурахъ далуси хъайи ва закурин даршлу йигъан дурарин гъайгъушнаъ духьну ккуни чве Рамин дявдин майдандиъ талаф гъахьну.
Рамин Гьяшимов 1995-пи йисан 21-пи декабри Хив райондин Ляхла гъулаъ бабкан гъахьну. 1997-пи йисан дурарин хизан Дагъустандиан Волгоград областдиз кючюрмиш шулу. 10-пи класс ккудубкIбалан кьяляхъ Рамин строительный колледждик урхуз кучIвру. Колледж ккудубкIу жигьил армияйин жергйириз гъягъюру ва, 2015-пи йисан Уьлкейин Яракьлу кьувватарихъди контракт йибтIну, Ватан уьбхру гъуллугънаъ дийигъуру.
Хусуси метлеб айи дявдин операцияйиъ сабпи йигъланмина иштирак шули кIакIнаъ айи кьягьялиз, Запорожский областдин, Луганский ва Донецкий республикйирин жилар гъаних душмнарихьан азад апIурайи вахтна, 2023-пи йисан гъагъи зиян гъабхьну. Контузия дубхьну, Ростов шагьрин аьзарханайиъ дахънайи Рамин, жвув фикрихъна гъафибси, бегьем сагъ хьайизра дявдин майдандиъ айи дустарихьна хътакуру ва кьисас алдабгъру гьунарар улупуб давам апIуру.
2025-пи йисан 31-пи июли дявдин майдандиъ жюрэтлувал улупури талаф гъахьи эскрарин майтар адагъури ва кубкIнайи игитариз сабпи кюмек туври гъизгъин ляхин гъабхури, дурар архаин йишвахьна адагъурайи вахтна, Раминдиз гъагъи зиян гъабхьну. Жвуван жанар Ватан уьбхбаз бахш гъапIу ва ихь кIваълан дурушру игитарин сиягьнаъ Раминра ахъру, ва 11-пи августди думу багъри гъулаъ фаракьат гъапIну.
«Учуз, чйириз, абин хулан гевюл ва далу вуйи гъардаш уьмриан гъягъюб гъилахъанмина ипIру уьлихъдира, алабхьру палатдихъдира гъафун гъабхьну. Адашди, учв гъардаш Ватандин гъуллугънаъ ади жюрэтлувал улупури уьмриан гъушну, кIури учу ккарцура хъа дадайи, чпикан саб келимара адарди йисариинди дудургнайи эскрарин багахьлуйирин кIвакан хабар гъадабгъай, ихьурин багъри гъулаъ накьваригъ накьв хьнура гъабхьну, кIури, учуз сабур тувра. Амма, гъургуриин гъахаргур алахъну гъапиганси, сари ктабтIури, тмунури бирхура. Сар абизна бабаз веледдин дерд ва сар чуччузра чвуччвун дерд дярябкъри, гизаф учIвруб ву. Гьяйифки, ич чве чазди вуйи хизан ккебгъуз хъуркьундар. Эгер дугъу мукь ккебгъну, хъа думу мукь’ан шюхъяр удучIвнайиш, цIибкьан юкIв ккядябхъюйич. Дурарихъан чвуччвхъанси тIяаьм гъюйчуз…» – ишури кIура бицIину чи Самирайи.
Ватан уьбхюб чан ифдиъ айи ихь ватанпервер Рамин, хъа дявдин майдандин дустари «Рома» ччвур тувнайи игит Суворовдин ччвурнахъ хъайи ордендин, «Дирбаш’вализ лигну», хусуси метлеб айи дявдин иштиракчи, Георгиевский крест медаларин ва йицIбариинди чухсагъул мялум апIбан кагъзарин сагьиб вуйи.
Макьалайин аьхириъ газатдин гъарашугъарин терефнаан Гьяшимоварин хизандиз сабсан ражну башсагълугъвал ва кIван сабур ккун апIураза.
