Зубайдат Шябанова
Табасаран район республикайиъ успагьи йишварикан саб ву. Сар шли-вуш райондин гюрчег табиаьт Швейцарияйихь тевнийи. Хъа успагьи йишваъ сифтена-сифте марццишин дюбхну ккунду. Дарш Швейцарияра хъархъвсарин ва зирзибилин урслиз илтIибкIуз мумкин ву. Гьаци, Табасаран райондиъ марццишин къайдайиъ уьбхюз ва хъархъвсарихьан марцц апIуз райондин глава Мягьямед Къурбановди вари рякъяр агура. Хъа, дюзди кIуруш, думу дугъан вазифйирик затра кабхърадар. Варибдикан хъайи-хъайиси кIурза.

Урусатдин правительствойиан Дагъустан шубуб – кьибла, кафари ва кьялан – терефариз жара дапIну, шубур оператор тяйин гъапIну. Кьибла терефнаъ «Горсервис» операторихь 16 район, Избербаш, Дербент ва Дагъустандин Огни шагьрар хьа. Табасаран районра гьадму операторин сиягьдик кабхъра.

 
ИкибаштIан, му операторихьан вари йишвар марцц апIуз удукьурадар.
Табасаран райондин аьтрафар зирзибилихьан марцц апIбиин муниципальный «Экостарт» идара машгъул ву. Ва му идарайин вакилари райондиъ санитарияйин аьгьвалат къайдайиъ уьбхбан рякъяр агура. Дидин кIулиъ айи Шихсалах Пирмягьямедовди ич сюгьбатнаъ мялумат тувганси, муниципалитетдиз му ляхин гъабхбан бадали лицензия лазим ву. Гьацира, региондин операторин ихтияр дарди райондиан полигондиина машиндиъди хъархъвсар гъурхну кIури, дурар кьабул апIудар. Гьар йисан райондиан хъархъвсар кьабул апIузди полигондиз 85 агъзур манат жара апIура.

 
«Гьамусяаьт райондиъ хъархъвсар уч апIру 79 йишв гьязур дапIнача. Думу йишвариъ дивуз 500-тIан артухъ контейнерар духна. Дурар 300-тIан артухъ райондин администрацияйин кюмекниинди, хъа имбудар гъуларин администрацйири масу гъадагъну.
Гьяйифки, региондин оператори чан улихь дивнайи вазифйир затра кIули гъахурадар. Дурари райондихъди жаради вуйи йикьрарра дийибтIнадар. Гьаддиз чпин вазифйир тамам апIуз буржлувалихъна дурар хуз шуладарчухьан. Оператори техника ва инсанар гьуркIри адруваликан кIура. Дурариз лигури район хъархъвсари ккапIуз гъитну ккундар. Гьаддиз учу зирзибилин урслар марцц апIуз чара зигурача. Думу ляхнариз пул лазим ву. Мисалназ, хъархъвсар гъахру машинар райондиъ шубубтIан адар. Дурариканра либхурайиб саб ву. Тмундар чIур духьна. Гьацира бензиндиз, маважибдиз аьлава дакьатар лазим ву. Лицензия адарди агьалйирихьан хъархъвсарихъан пул бисуз ихтияр адарчуз. Гьамусяаьт райондин агьалйири сардира зирзибилихъан пул туврадар. Хъа учву фикир апIинай, сад йигъан хъархъвсар марцц дарапIиш, думу йишвар аьхю урслариз илтIикIуру. Магьа Хючнаъ ТIаттил терефнаъ айи хъархъвсар дахьру йишв’ин 24 контейнер ал. Думу йишв гьар йигъан марцц апIура. Сад йигъ гъидипиш, контейнерарра ацIну, гъирагъарихъанмина йишварра хъархъвсари ккаъру. Хъа саб машиндихьан райондин 74 гъулан хъархъвсар уч апIурайи 79 йишв марцц апIуз удукьурин!? Му аьгьвалат Хючна гъулаъ хъархъвсар дахьру урслариин йишв амдрували хъана гъагъи апIура.
Улихьнаси Акъа ва СиртIич гъулариъ айи аьхю урслар марцц гъапIунча. Гьамус райондиъ Ярса гъулаъ ГУП-дин ихтиярнаъ айи жилиин аьхю урсил алми. Думу урслихьна машин хъапIуз мумкинвал адар. Дарш думура марцц апIуйча», – къайд апIура Шихсалах Пирмягьямедовди.
Дугъан мялуматариинди, райондин главайи райондин аьтрафариин марццишан уьбхюб ккун апIури, субботникар тешкил апIбан табшуругъар тувру. Гьацира хъархъвсар гъахру машин рас апIуз, бензиндиз, машин хъапIруриз пул райондин бюджетдиан жара апIури шулу.
Региондин оператори чан вазифйир кIули гъахурадаршра, марццишан уьбхбаан ва успагьивалиан Табасаран район республикайиъ варитIан улихь хьайидарикан саб вуди гъубзра.