Мейлан Нежефов
Хив райондиъ «Милли сес. БицIидар – 2024» конкурсдин натижйир гъивну. Думу 15-пи апрелианмина кIули гъябгъюрайи.
Конкурсдин иштиракчйир Хив райондин мектебариъ урхурайи табасаран, лезги ва урус чIалариинди мяълийир апIру баяр-шубар вуйи. Мяълийир апIбан конкурсдиъ 6 йислан 17 йис’ина яшар духьнайи 25 бицIир иштирак гъахьну.
Конкурс шубуб пайнакан ибарат шулу: сифте конкурсдиз дуфнайидарин варидарин сеснахъ хъпехъуру, хъа сабпи пайнан кьяляхъ гъузу бицIидари кьюбпи пайнаъ командйирин дахилнаъди мяълийир апIуру, шубубпи пай – му конкурсдин финал.
Яшариз дилигну жара дапIнайи дестйириъ гъалибчйир жюрийин членари дивнайи балларин бинайиинди аьгъю апIуру. Финализ удучIвдариз варидариз иштиркчийин дипломар, хъа гъалибчйириз кубокар, дипломар ва пулин пешкешар тувру.
Ццийин талитнаъ сабпи йишв ЗахтIарин гъул’ан вуйи Самира Мягьмудовайиз, кьюбпи йишв Хиван вуйи Аьйша Шигьягьмедовайиз, хъа шубубпи йишваз ЦIинитI гъулан бай Саид Сулейманов ва Хив гъулан риш Фатима Гьюсейнова лайикь гъахьнийи. Хъа тамаши хъапIуз дуфнайидариз варитIан кьабул хьувалин пешкеш Ляхла гъул’ан вуйи Шекер Гьяжимурадовайиз тувну.
Конкурсдин гьякьнаан чан фикрар ачухъ апIуб ккун апIури, узу райондин культурайин, спортдин, жигьиларин политикайин ва туризмдин отделин кIулиъ айи Казбек Къазиевдихьна илтIикIнийза.
«Гьаму жюрейин конкурс ихь райондиъ 2020-пи йисхъанмина кIули гъабхурача. Йислан-йисаз иштиракчйирин кьадар артухъ шулайибдиин шад вуза. Мидин гьякьнаан чухсагъул мялум апIуз ккундузуз гъуларин культурайин хуларин гъарашугъариз ва мектебариъ музыкайин дарсар киврайи мялимариз. Конкурсдин метлеб, гъи ихь арайиан халкьдин культура, чIал, меденият дубгурайи вахтна, аргъаж шулайи наслар ихь абйирилантина гъубзнайи девлетнан ирснахьна кьяляхъ хътаркуз гъитуб ву. Эгер гъи имиди ухьу му ляхин дурубхиш, закур кьан хьибди, ва шлиз аьгъя, сад йицIуд йислан ухьу фтин эйсир шулуш. Гъит халкьдин музыкайин алатарин ва мяълийирин нугъатарин ирс ихь баяр-шубарин дамарариъ гьарган гьевеслуди атIабгри», – къайд гъапIнийи Казбек Къазиевди.
Дупну ккундуки, К.Къазиевдин мурадар кIулиз удучIвура. Мисалназ, 2022-пи йисан гьаму конкурсдиъ гъалиб гъахьи ЦIудихъ гъул’ан вуйи Луиза Аьшурбегова гъи райондин дережайиъди гъягъру мяракйириъ, концертариъ иштирак шула ва уткан сесниинди табасаран ва урус чIалариинди мяълийир апIура.
