Наргиз Гюлечова

Гьаму йисан 1-пи августдилан декабрин 30-пи йигъаз хусуси метлеб айи дявдин операцияйиъ иштирак хьпан бадали контракт гъийбтIу касариз федеральный бюджетдиан саб ражари тувру пулин кьадар 400 агъзур манатдиина за гъапIну. Мидин гьякьнаан вуйи указдихъ Урусатдин Президент Владимир Путинди къул гъизигну.

 

Къайд апIуб лазим вуки, мидиз улихьна, хусуси метлеб айи дявдин опрерацияйиз чпин хушниинди душну, женгариъ иштирак хьпан бадали контракт гъибикIу агьалйириз федеральный бюджетдиан саб ражари тувру пулин кьадар 195 агъзур манаттIан дайи. Хъа цIиб улихьнаси Дагъустандин Главайира региондин бюджетдиан дицдар касариз туврайи пулин кьадар 500 агъзур манатдиина за гъапIну.

Янаки, 1-пи августдилан башламиш дапIну, хусуси метлеб айи дявдин операцияйиъ иштирак хьуз контракт гъибикIу касариз сабишв’инди 1 миллион манат гъадабгъуз мумкинвал дубхьна. Гьадму кьадарнак муниципалитетдиан туврайи 100 агъзур манатра кабхъра.

Хусуси метлеб айи дявдин операцияйиъ иштиракчи хьпан бадали контракт бикIуз 18 йислан 60 йис’ина яшариъ айи Урусатдин агьалйиризси, харижи уьлкйирин агьалйиризра мумкинвал а.