Гюльнара Мягьямедова
Дагъустандиъ сабпи ражари контрактдиинди вуйи дявдин гъуллугъназ ватандашар гъядягъбан пункт ачмиш дапIна. Республикайин ва харижи уьлк-йирин 18 йис тамам дубхьнайи гьарсар ватандашдихьан, дина дуфну, РФ-дин оборонайин министерствойихъди контракт йибтIуз шулу. Гьамусяаьт думу ляхин тамам апIуз лап рягьятди ву: пунктназ дуфну тялукь аьрза гъибикIхъан сагъламвалин гьякьнаан медицинайин ахтармишар духну, ватандашдиз хусуси номер тувра ва думу дявдин гъуллугъ гъабхру йишваз гьаъра.
Гьаму мялуматар 10-пи октябриъ «Дагестанская правда» газатдин редакцияйиъ контрактдиинди вуйи дявдин гъуллугъназ ватандашар гъядягъбан пунктнан начальникдин вазифйир тамам апIурайи капитан Мягьямеджамил Салаватовди республикайин СМИ-йин вакиларихъди гюрюшдиъ тувнийи.
– РФ-дин оборонайин министерствойи республикайин улихь план дивна. Гъийин йигъаз план саки 35% тамам дапIна. Республикайин вари муниципалитетариан ватандашар контрактдиинди дявдин гъуллугъниина гъюра. Эгер медицинайин улупбариинди дявдин гъуллугъназ гъягъюз ихтияр аш ва аьрза бикIбан кьяляхъ лазим вуйи документар гъахиш, кьюд-шубуд йигъандин арайиъ ватандашар Владикавказ шагьриъ айи резервдин батальондиз гьаъра. Душваъ кьюб гьяфтайиъ гьязурлугвал дубхну, дурар дявдин частариз жара апIура, гьадлинтина СВО-йин зонайиз гьаъра. Контрактдиинди гъуллугъ гъабхурайирин маважиб 204 агъзурилан зиина ву», – мялумат тувнийи капитан Мягьямеджамил Салаватовди.
Дугъан гафариинди, военный комиссариатдиан мобилизацияйин дахилнаъди СВО-йин зонайиз чан хушниинди гъягъювална контрактдиинди вуйи гъуллугъназ гъягъювал саб дар. «Контрактдиинди вуйи гъуллугънаъ вахтнан, жавабдарвалин, тувру маважибдин тафавутлувал а», – гъапнийи дугъу.
Къайд апIурача, контрактдиинди вуйи гъуллугъназ 18 йислан 60 йис’ина яшар вуйи ватандашар кьабул апIура. Дустагъдиъ жаза гьадабтIну азадвализ удучIвну адрударихьанра контракт йибтIуз шулу. Мягьямеджамил Салаватовди гъапиганси, экстремиствалин маддайиинди дустагъдиъ жаза гъизигдар контрактдиинди вуйи гъуллугъназ кьабул апIурадар.
Мягьячгъалайиъ ачмиш дапI-найи контрактдиинди дявдин гъуллугъназ ватандашар гъядягъбан пунктнаъ саки 35 касди ляхин апIура. Дурарин метлеб контрактдиинди вуйи гъуллугъназ ватандашар жалб апIуб ву.
Ихь уьлкейин вари халкьар, гъалибвал гъадабгъну, Урусатди Украинайиъ гъабхурайи хусуси метлеб айи дявдин операция ккудубкIбаз ккилигура. Хъа гьеле думу ккудубкIайиз, гьарсар ватандашди уьлкейин маракьар чахьан удукьруси дюрхну ккунду.
