Гюльнара Мягьямедова

Мягьячгъалайиъ 18-20-пи сентябриъ Костромайин гьюкуматдин театрин «Аьхю гастролйир» кIули гъягъюра. Дидин гьякьнаан 18-пи сентябри журналистарихъди вуйи пресс-конференцияйиъ А.Н. Островскийин ччвурнахъ хъайи Кострома шагьрин гьюкуматдин драмайин театрин вакилари мялумат тувнийи. Театрин художествойин руководитель Сергей Кузьмичдин гафариинди, дурари Дагъустандин агьалйириз «Капитандин риш», «Фронтдин альбом», «Деллу пул» спектаклйир улупиди.

 

Журналистарин суалариз жаваб туври, Сергей Кузмичди гьамци гъапну: «Учу Республикайиъ гизаф ужуди кьабул гъапIну, учуз хъайивал апIура, ич хатIасузвал убхюра, жюрбежюр экскурсйириз хъади гъягъюра. Дагъустандиъ лигуз, сиягьят хъапIуз лайикь йишвар гъизаф а. Учу садпи йигъан «Сулакдин дараскьал гъяриз» лигуз гъушунча, кюгьне Дербентдиз гъягъюзра улар хъайич. Учура ичIи хилди дуфнадарча, республикайиъ шубуб спектакль улипидича. Ич метлеб – Дагъустандин агьалйириз учу духнайи спектаклийир кьабул хьуб вуйич».

Гастролйир РФ-дин культурайин министерствойин ва Федеральный гьюкуматдин бюджетдин культурайин «Росконцерт» идарайин кюмекниинди «Аьхю гастролйир» программайин дахилнаъди гъягъюра.