Гюльнара Мягьямедова
Июндин 3-пи йигъан «Урусат – йиз тарих» тарихи паркдиъ Дагъустандин Глава Сергей Меликовди 23-пи июнди террористарихъди вуйи женгнаъ иштирак гъахьи 20 полицияйин вакил Кьягьялвалин орденариинди лишанлу гъапIну. Дурарикан 17 – йикIбан кьяляхъ. Террористарин хил’ан гъийиху полицейскйирин орденар гюрюшдиз дих дапIнайи дурарин багахьлуйирихьна тувну. Полицияйин 10-сана гъуллугъчйир «Дирбаш’вализ» II дережайин медалар тувбиинди лишанлу гъапIну.
Уьлкейин Президентдин къарарниинди кешюш Николай Котельниковдизра (йикIбан кьяляхъ) Кьягьялвалин орден, хъа кафедральный соборин гъаравул Михаил Вавилиндиз «Дирбаш’вализ» медаль тувну.
Уч духьнайидариз салам тувбан кьяляхъ Сергей Меликовди къайд гъапIганси, наградйир Урусатдин МВД-йин рякъяриъ гьяракатнан хатIасузвал уьбхбан гьюкуматдин инспекцияйин йигъан тувра.
«Гъийин гюрюшдиъ жямяаьтлугъдиз лайикьлу, чпи туву гафназ вафалу инсанарикан сабансан ктибтуз мумкинвал шула. Дицисдар инсанар, Дагъустандиъси, республикайин гъирагъариъра а. Террористарихъди вуйи женгнаъ гъуллугънан командировкайиъ айи Тюмендин областдин МВД-йин ДПС-дин гъуллугъчи Виталий Мезенцевра гъакIнийи», – гъапну дугъу.
Сергей Меликовди ерли агьалйир хатIайихьан ярхла апIбаъ чан жан фида гъапIу къанун уьбхру органарин жигьил гъуллугъчи Гьябиб Аьлиевдиканра ктибтнийи. «Гьябиб душмандихъди женгназ удучIвну ва чан ужурсир дустрахъди гъакIну. Гьадмуганси гьамусра гьарсар дагъустанлу, хилиз яракь гъадабгъну, диндин лишниккди Дагъустандин жямяаьтлугъдин арайиъ цIа ипуз ккунди айидарихъди женгназ удучIвуз гьязур вуйивалиин шаклу дарза», – гъапну Дагъустандин Главайи.
Гюрюшдиз уч духьнайидари саб дакьикьайиъ ккебехъну гъузбиинди къанун уьбхру органарин гъийиху гъуллугъчйирин гьюрмат гъюбхнийи.
«Дурариз хизан, багахьлуйир, дустар ва гъарашугъар ккилигурайи, хъа дурар игитарси гъийихну. Хусуси метлеб айи дявдин операцияйин иштиракчйирииндиси, гьадрарииндира дамагъ апIидихьа», – къайд гъапIнийи Сергей Меликовди.
Дагъустандин Главайи гъапиганси, хусуси метлеб айи дявдин операцияйин иштиракчйиризси, 23-пи июнди терактариъ гъийихдарин ва зийнар гъахьидарин хизанаризра вари льготйир тувди.
«Республикайин бюджетдиан полицияйин гъийиху гъуллугъчйирин гьарсаб хизандиз 1 миллион манат, хъа сенатор Сулейман Керимовди чан гьисабнаан 5 миллион манат тувди. Наградйир тувбахъди аьлакьалу вуди, идарайин терефнаанра выплатйир хьиди. 23-пи июнди зийнар гъахьидаризра пулин кюмек тувди, дидихъди сабси жара месэлйирра гьял апIиди. Игитарси гъийиху полицияйин гъуллугъчйирин гьюрмат уьбхбазра фикир тувди», –къайд гъапIну РД-йин Главайи.
