Мейлан Нежефов
Украинайин жилариин гъябгъюрайи хусуси метлеб айи операцияйиъ сабпи йигъланмина иштирак шулайидарин цIарнаъ Мурад Абумислимовра а. Гъийин ихтилат гьадгъвакан хьибди.
Мурад 1995-пи йисан 15-пи майди Хив райондин Хив гъулаъ Фазил ва Марият Абумислимоварин аьхю хизандиъ бабкан гъахьну. 2012-пи йисан заан аьгъювалариинди багъри гъулан М. Шамхаловдин ччвурнахъ хъайи мектеб ккудубкIбалан кьяляхъ, думу Казандин танкарин командйир гьязур апIру заан училищейик урхуз кучIвру. Училищейин кьяляхъ лейтенант звание ади Мурад аьгъювалар ккатIарццуз направлениейиинди Челябинск областдин Чебаркуль шагьриз гьаънийи.
Гьамусяаьт Мурад Абумислимов 2022-пи йисан 24-пи февралианмина Урусатдин Федерацияйи Украинайин жилариин гъабхурайи хусуси метлеб айи дявдин операцияйиъ иштирак шула. Чебаркуль шагьрин танкарин 3-пи батальондин штабдин начальник, 90-пи гвардияйин танкарин дивизияйин, йирхьубпи танкарин полкнан капитан Мурад Абумислимов, хусуси метлеб айи дявдин операцияйиъ улупурайи гьунарариз ва гъуллугънаъ гъазанмиш гъапIу хъуркьувалариз лигну, II дережайин «Ватандин улихь лишанлу хьпаз», «Дирбаш’вализ лигну», Жуковдин, Суворовдин ва гьаму йигъари «Женгариъ лишанлу хьпаз» медалариз лайикьлу гъахьну.
«Табасарандин нурар» газатдин редакцияйин терефнаан аьхиримжи тувнайи медалихъди тебрик апIури, узу ихь кьягьялин адаш Фазил Абумислимовдихьна илтIикIнийза.
«Аферин! Йиз фикриан, душваъ сад йигъан хьнура гъахьир аьхю гьярфналан Игит ву. Хъа гьацдар жюрэтлувал улупурайи кьягьяларин кIакIнаъ а ихь Мурадра. Ухьуз шлу игитар дявйириндар даришри, хъа анжагъ жил’ина ислягьвал кьисмат дубхьну, игит духтир, игит мялим, игит шаир ва жара лайикьлу ччвурар артухъ ишри. Хъа гьапIхьа, гьамусдин вахт гьациб ву. Эгер гъи ухьу гьаму гъазават аьгь ва гьял дарапIиш, закур кьан хьибди. Гьаддиз ухьу дурариз ихь сабурлувалиинди ва хайирлу дюъйириинди кьувват тувну ккун. Хъа Мураддикан улхруси гъабхьиш, думу чан аьхю абйирин ватанпервервалин рякъ баркаллувалинди давам апIурайи игит ву. Дугъан набалугъди имиди чаз кадабгънайи рякъ эскервалинуб вуйи. Лигру кинора, хизандин арайиъ апIру гафар-чIаларра кмиди гьарган ватандихъан юкIв убгрудар вуйи. Дугъан гьадму гьякьлу сурат гьаци вуйиб хьуб ражари контузия дубхьну, къабдилан зина гъутIуркIу сяняьтарин тикйир бедендиан адагъбан бадали хьубан операция дапIнашра, гъи, сабдизра дилигди, ярар-дустарихъди гьатушваъ айивали субут апIура. Учуз дугъан адресназ гьар йисан шубуб-юкьуб чухсагъул мялум апIбан гьюрматнан кагъзар гъюри а. Дугъан гьадму йислан-йисаз артухъ шулайи хъуркьувалариин кьадарсуз разиди вуча, дамагъ ва фурс апIурача. Учухъди сабси дугъаз чан уьмрин юлдаш Дарья Игоревна, кьюр велед – Амир ва ТIагьир – ккилигура. Йиз аьхю мурад-метлеб гьадму вуйизки, гъаних душмниин гъалиб духьну, гьаму йигъари ихь баяр пайдагъ хилиъ ади сагъ-саламатди багъридарихьна хъадакну гъюб», – гъапнийи Фазил Абумислимовди.
