Гюльнара Мягьямедова
Майдин вазлин аьхириъ Дагъустандин Глава Сергей Меликовди республикайин «Дагъларин жюрэтлувал» программайин жямяаьтлугъ советдин заседание кIули гъубхну. Душваъ конкурсдин сабпи пайнан натижйир гъивну.
Республикайин «Дагъларин жюрэтлувал» программайиъ Кьягьялвалин ордендин сагьибар вуйи 82 кас иштирак шула.
Дидин гьякьнаан прграммайин жямяаьтлугъ советдин заседаниейиъ РД-йин Главайин гьюкуматдин гъуллугънан, кадрйирин ва гьюкуматдин наградйирин месэлйириз лигру управлениейин кIулиъ айи Земфира Кашкаевайи мялумат тувнийи.
Программайиъ иштирак хьуз ккунди, варитIан гизаф аьрзйир оборонайин министерствойин, Росгвардияйин, МВД-йин, гьюкуматдин, муниципальный органарин гъуллугъчйирихьан гъафнийи.
«Программайин иштиракчйир гъядягъруган, ватандаш ляхнариъ, иштиракчийин тажруба, звание, дугъаз айи наградйир ва хъуркьувалар гьисабназ гъадагъури гъахьну. Экспертарихьан иштиракчийин ччвур аьгъю апIуз дархьбан бадали, анкетйириъ ччвурар улупнадайи», – къайд гъапIнийи Земфира Кашкаевайи.
Программайин очный пай (машна машди сюгьбат гъабхбан пай) фила кIули гъябгъюруш, вахт ккимиди мялумат тувди. Конкурсдин вари паяр хъуркьувалиинди тамам гъапIдар Дагъустандин идарйириъ гъуллугъариъ дерккбан бадали, кадрйирин резервдин сиягьназ гъадагъиди.
Заседаниейиъ иштирак гъахьи «Игитарин вахт» федеральный программайин иштиракчи, Урусатдин Игит Темирлан АбутIалимовди региондин программайин конкурс гъабхбаз заан кьимат тувну.
Жямяаьтлугъ советдин заседаниейиъ дугъу гъапиганси, иштиракчйирин арайиъ женгариъ йицIбариинди эскрарин уьмрар аьжаликкан ккадагъу, чпин жандилан хил алдабгъну женгар гъуху гьякьлу игитар а. «Программайин иштиракчйириз Дагъустандин артмиш’вал бадали зегьмет зигуз ужудар аьгъювалар тувди. Верховный кIулин командующийин тешкиллувалиинди уьмриз кечирмиш апIурайи ва республикайин кIулиъ айи Сергей Меликовди кюмек туврайи программайи уьмрин дюз рякъюъди гъягъру, ватанагьлийирин яшайиш къайдайиз хуз ккуни ватанперверар арайиз адагъиди», – гъапну дугъу.
Сергей Меликовди Федеральный прграммайиъ иштирак гъахьи ва тажруба айи Темирлан АбутIалимов региондин программайин экспертарин дахилназ гъадагъбан теклиф дивну.
КIваина хурача, «Дагъларин жюрэтлувал» проект, федеральный «Игитарин вахт» программасиб, региондин программа ву.
