Гюльнара Мягьямедова
Гьамусяаьт Урусатди Украинайиъ гъабхурайи хусуси метлеб айи дявдин операцияйин гьарсар иштиракчи игитси гьисаб апIуз шулу. Дурари Ватандин маракьар уьрхювал чпин намуснан буржи вуди гьисаб апIура. Миллетчивалихъди дяви гъубху чпин аьхю абйирин ляхин давам апIури, дурари ватанпервервалин гьиссниинди гюллдин улихь мухур гьивну, гьар йигъан аьхю гьунарар улупура.
Газатдин машариъ швнубна саб ражари дупну ашра, текрар апIуз инжик шулдархьа: гьацдар кьягьяларин арайиъ ихь табасаран баяри лайикьлу йишв дибисна.
Улихьна йигъари РД-йин милли политикайин ва диндин ляхнариз лигру министерствойин кIулиъ айи Энрик Муслимов ихь ватанагьли, Урусатдин Федерацияйин ВДВ-йин 76-пи гвардияйин штурмовой дивизияйин командирин сарпи заместитель, штабдин начальник Аьбдулязиз Шигьябидовдихъди гюрюшмиш гъахьну ва министерствойин терефнаан офицериз Гьюрматнан ва лайикьлувалин лишан тувну.
Аьбдулязиз Шигьябидов 1986-пи йисан Табасаран райондин СулантIил гъул’ан вуйи, полицияйин полковник, Урусатдин ФСНК-йин гьюрматлу пишекар Ширинбег Шигьябидовдин хизандиъ бабкан гъахьну. Ширинбег Шигьябидов учв, ужур гъуллугъчиси, «Табасарандин нурар» газатдин гъудуркьу дустра вуйи. Дугъу Республикайиъ наркотикар уьрхбахъди ва тарагъбахъди чпин идарайи гъабхурайи женгнакан, профилактикайикан мяна айи хайлин материалар хътаури шуйи. Ширинбег Шигьябидовди чан баяриз туву тербияйира ужудар натижйир арайиз гъахну.
Мектеб ккудубкIбан кьяляхъ Аьбдулязиз Шигьябидов 2008-пи йисан Рязань шагьрин Завунна десантарин командный училище, хъа 2020-пи йисан Урусатдин Яракьлу кьувватарин уьмуми кьушмарин академия ккудубкIну. Яшар цIибтан даршра, ихь кьягьял бай Чечен республикайиъ, Кьибла Осетияйиъ, Сирияйиъ дявдин женгариъ ва Украинайиъ гъябгъюрайи хусуси метлеб айи операцияйиъ иштирак гъахьну. Думу ВДВ-йин Псковдин десантдинна гьюжум апIбан 237-пи полкнан командирди гъахьну. 2022-пи йисан февралиан апрелизкьан дугъу «Восток» дестейин кьушмарин парашютаринна десантдин 51-пи полкнан командирди гъуллугъ апIури гъахьну.
Аьбдулязиз Шигьябидов шубуб ражари Кьягьялвалин орден, гьацира Суворовдин, «Жюрэтлувализ лигну», «Ватандин улихь лишанлу хьпаз лигну» 1-пи ва 2-пи дережайин, гьацира хайлин жара орденар ва медалар тувбиинди лишанлу дапIна.
Уьлкейин Президент Владимир Путинди ихь офицер Аьбдулязиз Шигьябидовдиз, дугъу Ватан бадали фидакарвалиинди гъуллугъ гъабхурайивализ лигну, кьюб ражари телефондиан дугъаз чухсагъул мялум дапIна. Ихь игитриз ва вари имбу эскрариз, гъалибвал гъадабгъну, чпин хизанарихьна кьяляхъ гъюб ккун апIурхьа.
