Наргиз Гюлечова
Хусуси метлеб айи дявдин операцияйин иштиракчйирикан вуйи «Табасарандин нурар» газатдин рубрикайиз материал бикIбан ният ади, гъубшу гьяфтайиъ учу юкьуб-хьуб ражари хусуси метлеб айи дявдин операцияйиз душнайи Магид Маллакъурбановдиз редакцияйиз дих дапIну, дугъахъди сюгьбат гъубхунча.
Магид Маллакъурбанов 1977-пи йисан Хив райондин Ляхла гъулаъ гизаф бицIидар айи аьдати табасаран хизандиъ бабкан гъахьну. Дурар 3 чвена 4 чи ву. Чвйир шубридра военный гъуллугънаъ айидар ву.
Мектебдин кьяляхъ 2002-пи йисан заан агъювалариз ДГУ-йин филологияйин факультетра ккудубкIну, Магид чаин али буржи тамам апIуз, армияйиз гъушну.
«Армияйиан гъафирин Владикав-каздиъ айи эскервалин институтдик урхуз кучIвуз планариъ ади гъабхьнийиз. Хъа думуган телефнар адру вахт вуйи, узухьна, экзаменар тувуз гъач кIури хъадапIнайи мялумат хъубкьайиз, сарун душваъ лазим вуйи кьадар студентар гъадагъну гъахьнийи. Гьаддиз, кьяляхъ дуфну, Каспийск шагьриъ ерлешмиш дубхьнайи гьюлин пияда кьушмарин эскервалин частнаъ контрактдиинди гъуллугъ апIуз хъюгъюнза. ЦIиб вахтналан учу Чечен Республикайин Веденойиз гьаънийи. Хъа 2009-пи йисан Каспийскдиан гьаънайи гьюлин пияда кьушмарин бригадайин гъуллугъчйирин кьадар цIиб гъапIнийи. Гьадмуган узу хъанара Каспийскдиз кьяляхъ дуфну, сарун гьамушваъ айи ОМОН-2-йиъ ляхниъ учIвнийза. Гьамус дидиз ОМОН «Скорпион» кIура», – ккебгънийи ихтилат Магид Маллакъурбановди.
Хайлин йисари эскервалин гъуллугъ тамам апIури, Магид Маллакъурбанов фукьан вушра жюрбежюр дявдин гьяракатариъ иштирак гъахьну, гьадму гьисабнаан Чечендин 2-пи кампанияйин гьядисйириъра, Дагъустандиъ гъахьи террористариз къаршу вуйи операцйириъра. Хъа 2022-пи йисхъанмина хусуси метлеб айи дявдин операцияйиз кми-кмиди командировкйириз гъягъюра.
«Эвелиан учхьан Казахстандиз командировкайиз гъягъюз ккунидар аш, гьерхнийи. Белки, думуган аьхюдариз аьгьвалатнакан агъяди гъабхьуншул, хъа учуз сарира чIалра гъапундайи.
Лазим вуйи кьадар эскрар саб дестейиз уч гъапIган, гьадрар вари Симферополин гъвалахъ хъайи Октябрский кIури йишваз хъади гъушнийчу. Гьадушваъ йишвну йивбар хьуз хъюгънийи, хъа аку гъабхьибси, Украинайизди учIвнийча.
Ич улихь дивнайи вазифа кьюд йигъандин арайиъ Запорожьейин администрация бисуб вуйи. Хъа гьяйифки, думу ляхин дишлади тамам апIуз гъабхьундар. Кьюб гьяфтатIан артухъ вахтна учу, гьаммишан ликриин алди, хябяхъдиан гвачIиндиз лицури гъахьунча.
Учу женгар гъягъюрайи терефназра гьауйи, хъа вушра, саб гьаму ляхин апIин дупну, адайи. Гьаддиз асас вуди уч’ин алипнайи вазифа яркврариъ лицувал вуйи. Ич бахт гъилибхну, учухь аьхю техника хьадарди. Даршиш, дронарихьди учу айи йишв аьгъю дапIну якьинди артиллерияйиан йивуйи.
Саб ражари учу, женгар гъягъюрайи йишвариина улдучIвиган, учуз минометариан йивуз хъюгънийи. Бахтнаанси, саб машиндикра кубкIундайич. Гьаци яваш-явашди гъюгъюри, хатIасуз йишвазди адахънийчу ва гьадму йишван сенграр адатIну, душваъ йишв гъапIнийча. Апрелин вазли учу эвез апIуз Росгвардияйин эскрарин жара десте гъафнийи. Гьаддихъан сарун Росгвардияйин улихьра тялукь месэлйир дивуз хъюгънийи. Асас вуди уч’ин илипнайи вазифа, документар ахтармиш апIуб, гюзчивал гъабхуб, постарилан деетувал тямин апIуб вуйи», — кIура Магид Маллакъурбановди.
Шубуд йисандин арайиъ, Магид 5 ражари хусуси метлеб айи дявдин операция гъябгъюрайи йишвариз душна. Шубуб вазли – Дагъустандиъ шулу, хъа шубуб вазли — гьадушваъ.
Росгвардияйин вакилариз Украинайин агьалйирихъдира фукьан вушра гаф-чIал апIуб алабхъура.
«Фукьан дурари яв машнаъ аьлхъюри, чпи уччвуди улупури ашра, гьич саризра ухьу кьабулди дар. Хъа саспидари кIурира шулу, «узуз, лапатка хьайи касдиз, фуну гьюкум вушра, фаркьвал адариз». Дугъриданра, аьдати касариз ккунди айиб анжагъ ислягьвалтIан дар.
Хъа вушра, батIур айи йигъари учу украинлуйирин хулариъ учIвру вахтна, учуз ликариин алахьуз пакетар ча кIуруган, дурар ихьдарин чпихьна вуйи янашмиш’валиин мюгьтал духьну шулу. Фицики чпин эскрар кьусум йивну, раккнар арццну, учIври шулич, хъа Урусатдин эскрар кIуруш, гьамци марцциди, адмивалиинди гъюрачухьна кIуйи. Янаки, кьабул апIруган ва гьаъруган учухьна вуйи янашмиш’вал дурарин жа-жараб шуйи.
Гьадму ляхин Магомаев кIуру ич командирин гьунар ву. Дугъу учкан гьаммишан аьдати касарихьна гьюрматниинди янашмиш хьуб ккун апIуйи.
Сабпи ражари учу ахтармиш’валин ляхнар тамам апIуз Андреевка кIуру гъулаз гъушнийча. ЦIиб вахтналан гьадушваъ хъанара шубуб вазлизди командировкайиъ гъахьнийча. Гьадму гъулан агьалйириз дагъустандин ОМОН гъафиган, чпин хатIасузвал уьбхруб аьгъю дубхьнайи. Ва зат чIатариз удудучIври айидар, учу гъафибси, хябяхъган кючйириз удучIвуз, магазнар арццуз хъюгъюйи. Дурари учуз, учвкан хатIа адруб аьгъячуз, кIуйи», – ктибтурайи Магидди.
Магид Маллакъурбановди чпи Украинайиъ айи вахтна дахъру йишварихъди, ипIрубдихъди вуйи агьвалатнаканра ктибтнийи. Дугъан гафариинди, гъийин йигъаз ихь эскрар варибдихъди тямин дапIна. ИпIру-убхърубра фукьан вушра а. Регионариан рягьимлувалин кюмекра ккунибкьан гъюра.
Гъи женгарин кьюбрид терефариан вуйи аьдати касаризси, ихь эскраризра ккунди айиб анжагъ ислягьвал ву. Гьарсар эскер сагъди ва гъалибвалиинди гъюбаз ккилигурача.
