Урусатдин яракьлу кьувватари Украинайиъ гъабхурайи хусуси метлеб айи операцияйиъ ихь баяри гележегдин гъалибвалик чпин лайикьлу пай киври, фицдар гьунарар улупураш, гьар йигъан рябкъюри ва ебхьури ахьуз.

 

Гьадрарикан сар – му дявдин гьяракатарин женгариъ жюрэтлувал улупурайи ихь ватанагьли сержант, аьхюну мастер Амрудин Къемберов Жуковдин ва «Дирбаш’вализ лигну» медалариз сагьиб гъахьну.
Амрудин Рамазанович Кемберов 1988-пи йисан 25-пи июндиъ Хив райондиъ Гъвандккарин гъулаъ Къембероварин хизандиъ бабкан гъахьну. Багъри гъулан 9-пи класс ккудубкIбалан кьяляхъ дугъу Каспийск шагьриъ ПТУ-йиъ автокрановщиквалин шубуд йисандин курсар урхуру.

2007-пи йисан 7-пи июндиъ думу Ватанди чан гъюнариин илипнайи буржи тамам апIуз гъягъюру, ва жигьили думу баркаллувалиинди кIулиз адабгъуру.
2009-пи йисхъанмина, контрактдиин къул дизигну, дугъу Чечен Республикайиъ гъуллугъ апIури гъахьну. Хъа 2014-пи йисан Луганскдин ва Донецкдин халкьдин республикйириъ гъахьи дявдин гьяракатариъ иштирак гъахьну. Гъи кьисматну ва чан ифдин дамарариъ айи ватанпервервалин гьиссари думу хусуси метлеб айи дявдин операцияйиъ иштирак хьуз мажбур гъапIну.

Гьамусяаьт жикъи отпускдиз дуфнайи Амрудин, хпирихъди ва шубур веледдихъди архаинвал гъадабгъури, Мягьячгъала шагьриъ а. Гъит Аллагьди Амрудиндиз хаин душман гуршвуз мюгькам сагъ’вал ва асландинубсиб кьувват туври!