Наргиз Гюлечова
16-пи декабри Дагъустандин РИА-йин конференцйир гъахру залиъ республикайин жигьиларин ляхнариз лигру министерствойи Ватан уьбхрударин йисан тамам гъапIу ляхнарин натижйир гъивну.
Конференцияйиъ министр Камил Сяидов, «Аьжалсуз полкнан» Дагъустандин отделениейин кIулиъ айи Марат Аьлияров ва РД-йин «ДагПатриотЦентр» ГБУ-йин директор Рамазан Мягьямадов иштирак гъахьнийи.
Конференция ачмиш апIури Камил Сяидовди гъапиганси, 2025-пи йис республикайин жигьилариз лап мянфяаьтлу йис гъабхьну. Фицики, йисандин арайиъ саки гьарсар жигьил касдихъди кIул’инди ляхин гъубхну гъапишра, гъалатI даршул. Гьамусяаьт республикайин жигьиларин 50%-тIан артухъ (580 агъзуртIан гизаф) жигьилар, волонтерарин гьяракатариъ учIвну, ватанпервервалин серенжемариъ иштирак шула. Министрин гафариинди, 2025-пи йисандин арайиъ республикайин жигьиларин ляхнариз лигру министерствойи саки 379 агъзуркьан инсанар уч гъахьи варждиланзина жюрбежюр серенжемар кIули гъухну. Гьадму серенжемарин арайиъ Ватандин Аьхю дявдин Гъалибвалин 80 йис хьбаз бахш дапIнайи серенжемарра а.
«2024-пи йисан Ватандин Аьхю дявдин Гъалибвалин 80 йисаз тешкил гъапIу варихалкьарин волонтерарин корпусдин республикайин муниципалитетарин штабари Дагъустандиъ 13 агъзур кас сатIи гъапIну. Му кьадар волонтерар уч хьуб’инди, вари Урусатдиъ ихь республика кIакIначи регион гъабхьну. Республикайин волонтерарин корпустди йисандин арайиъ Гъалибвалин 80 йис хьбаз бахш вуйи 3 агъзуртIан артухъ жюрбежюр серенжемар кIули гъухну.
Мидланра савайи, йисандин арайиъ образованиейинна ватанпервервалин тербия тувбан ляхнин дахилнаъди, Дагъустандиан 230 мектебариъ урхурайи баяр-шубар женгарин машгьурвалин Волгоград, Севастополь, Москва, Санкт-Петербург, Мурманск ва Гаджиево шагьрариз гъушну», – гъапну министри.
Чан улхуб давам апIури, Камил Сяидовди «Игитарихъди гаф-чIал» кIуру проекдикан гъапнийи. Дугъан гафариинди, му проект, аргъаж шулайи наслари гъийин йигъан хусуси метлеб айи дявдин операцияйиъ иштирак шулайи эскрарихъди гаф-чIал апIуб метлеб ади, уьмриз кечирмиш апIурайиб ву. Гъийин йигъаз проектдин дахилнаъди, чпи тамам апIурайи гъуллугънаъ гьунарар улупну, жербежюр наградйириинди лишанлу дапIнайи эскрарихъди 5 агъзутртIан артухъ жигьилар уч дапIнайи 20-тIан артухъ гюрюшар гъахьну.
Конференцияйин иштиракчи, республикайин Халкьдин Собраниейин депутат Марат Аьлияровди «Аьжалсуз полкнан» Дагъустандин отделениейи гъабхурайи ляхниканра гъапнийи. Дугъан гафариинди акцияйиъ иштирак шулайи касарин кьадар йислан-йисаз швнуб-саб ражари артухъ шула.
Марат Аьлияровди къайд гъапIганси, «Аьжалсуз полкнан» тешкилатди тамам апIурайиб, майдин вазли саб акция гъабхбан ляхин дар. Янаки, зат дидригъди музеяр, тарихдин архив урхюрайи библиотекйирихъди Ватандин Аьхю дявдин вахтари шил амдарди гъудургу касар агбан ляхин гьаммишан гъабхури гъубзди.
«Дицдар касар агузра ич тешкилат кюмекназ гьязур ву», – гъапну Марат Аьлияровди.
Конференция аьхирихъна гъюри, Дербент, Мягьячгъала ва Каспийск шагьрарикан сабдин кючейиъ Урусатдин Игит Исрафил Мягьямадовдин ччвур иливуз кюмек тувуб ккун апIури, узу депутатдихьна илтIикIунза. Дугъу табасаран халкьдин жямяаьтлугъ касари чан чвурнахъ кагъаз бикIуб ккун гъапIнийи ва гьадму кагъаз хьади республикайин Глава Сергей Меликовдихьна илтIикIуз гаф тувнийи.
