Мейлан Нежефов

Улихьна йигъари Хив райондин «Аку хяд» газатдин редакцияйиз табасаран халкьдин шаир, журналист, жямяаьтлугъ кас, Дагъустан Республикайин лайикьлу юрист ва Хив райондин гьюрматлу ватандаш Багъир Ражабов хялижв гъахьнийи.

 

Шаири чахьди «ДиликIузди хъиршдар» кIуру чан китабдин саб чIвеъра дубхнайи. Литература урхуз иштагь айи касарихьан дурар Хив райондин А. Жяфаровдин ччвурнахъ хъайи кьялан библиотекайиан пулихъ масу гъадагъуз шулу. Уч гъахьи дакьатарихъ Багъир Ражабовдин гьамусяаьт Украинайиъ гъябгъюрайи хусуси метлеб айи дявдин операцияйиъ иштирак шулайи ихь игитариз гуманитарный гъагъ хътапIуз ният а.

Дупну ккундуки, гьаму жюрейин акция халис ватанпервери республикайиъ коронавирусдин уьзур тарабгънайи вахтнара кIули гъубхнийи. Думуган Багъир Ражабовди чан хусуси пайра кивну уч гъахьи кепкер гьадму уьзриан иццру духьнайи ва аьзарханайиъ дахьнайи ватанагьлийириз рубар-дармнар гъадагъуз харж гъапIнийи.
Ихь шаириз ужудар мурад-метлебарихъ хъуркьуб ва кIваъ айи ниятар юрутмиш апIуз мюгькам сагъ’вал ккун апIураза.