Мейлан Нежефов
Гьаму йигъари Хив гъул’ан вуйи кьюр чве Умахан ва Саид Мирзялиевари нубатнан ражари спортдиан райондиз кьюб пешкешнан йишв гъахну. Баярин хъуркьуваларикан ктибтуб ккун апIури, узу дурарин адаш Максим Мирзялиевдихьна илтIикIунза.

«Гьелбетда, вари абйирин баяриси, йиз кьюрид веледдира, узу чпин улихь диву теклифар кьабул дапIну, спортдин рякъ ктабгъну. Сифте, мектебдик кучIвайиз улихьна, дурар кьюридра дзюдойиз гъягъюри гъахьнийи. Хъасин, мектебдиъ айи ярар-дустарихъди ММА-йин спортдин союздин гъидикьнайи кчIихбариин машгъул гъахьну. Хъа гъи Умаханди 5-пи, хъа Саидди 4-пи классдиъ урхура. Гьаму бицIи вахтнан арайиъ дурари, райондиъ гъягъюрайи талитариъ ктарди, Мягьячгъала, Дагъустандин Огни, Дербент шагьрариъ ва СтIал Сулейман райондиъра йицIбариинди ражари пешкешнан йишвар гъадагъна. Гьадму гьисабнаан, гьаму йигъари Кьасумрин гъулаъ кIули гъушу жюрбежюр жюрйир гъидикьнайи кчIихбарин талитариъ Саидри 1-пи йишв, хъа Умаханди 3-пи йишв гъибисну.

Фукьан чпин юкIв вушра, фукьан илчIихишра, тренерарин гужли аьгъюваларин гьевес гъурубкьундайиш, дурариан мицисдар хъуркьувалар улупуз удукьурдайи. Узуз гьамциб мумкинвал ккабхъну имиди, дурарин ччвурар ктухури, гьаруриз жа-жаради баракаллагь пуз ккундузуз. Дурарин дестейиъ гьацира Гьяжирамазан Гьяжиев, Анзор Аьлиризаев, Ильяс Ибрагьимов ва гьамус Камил Аьбдурягьмановра а. Джиу-джитсуйиан ва боевой самбойиан уьлкейин чемпион Камили Сардаркентдиъ «Скала» клубдиъ аьгъювалар тувра. Ляхнихьан азад вахт айиган, баяр узу гъахури шулза, хъа имбу вахтари таксистдихъди гьаъраза. Бизарвалар ва харжар сабра улариз рябкъюрдар, арайиъ саб фукIа ужуб ва хайирлуб айиган», – кIура баярин хъуркьувалариин разиди айи адаш Максимди.