Мейлан Нежефов
Ухьуз мялум вуйиганси, 15-17-пи мартди уьлкейин президент ктагъбан сечкйир кIули гъушнийи. Думу сечкйириъ чав фици сес тувнуш гьаддикан ва уьлкейин яшайишдин агьвалатнакан жвуван фикрар 88 йис яшнаъ айи Аьйшат Гьясанбеговайи (шиклиъ) ачухъ апIура.
«Яшариз дилигди, узура сечкйириъ иштирак хьуз ният гъапIнийза. Йиз аьрзайиинди ич сечкйирин участокдиъ лихурайидар йиз сес кьабул апIуз хулаз гъафнийи. Иштирак хьуз фти аьшкь ва юкIв капIнушра кIарзавуз, жан бай. Узуз йирхьур велед, къанна кьюр худул ва йицIихьур гудул азуз. Гьадрарин гележег акуб хьпан умуднак йизра пай кивунза.
Йиз фикри аннамиш апIуз хъюгъю йигъланмина Сталиндин кьяляхъ Путинси, Ватандихъан ва халкьдихъан юкIв убгури, думу ляхниз чан жан бахш апIру президент ухьуз гъахьундар. Гьаддиз йиз сесра дугъхъанди тувунза. Халкьди думу цIийикултIан кадагъну, уьлкейин руль хъана дугъан хилиз тувиган, багъри велед армияйиан гъафирси, фукьан вушра шад гъахьунза. Хъа ихь арайиъ гъи сечкйиризси, Путиндизра къаршу вуйидар цIиб адар. Дурарин гафариинди, сечкйирикан, дявйирикан, машкврарикан улхруган, Урусат ихьуб дар. Хъа ляхнар-карарикан, маважибарикан, ипотекйирикан ва бицIидариз вуйи пособйирикан улхруган, Урусат мураринуб ву. Аьжайиб ляхин ву!
Ич вахтари велед гъахи бабаз бегьемди саб ражари бай гъидитIру цIили-пIиликьан адайи. Хъа гъи, жил’ина велед хайизра фуниъ имиди бабаз пулар а. Хъасин, йицIимиржид йис хьайизкьан думу уьрхюзра пул тувра. Саб гафниинди, гъи абйир-бабари баяр-шубар уьрхюрадар, хъа шинтаъ имиди, веледди абйир-бабар уьрхюра. Гъи варидариз рябкъюрахьуз, дюн’яйин гьял фициб дубхьнаш. Гьаци вушра, фуну ляхнин маважиб тувуз кьан апIурахъа?! Хъана шюкюр ибшривуз Первердигар! Кьюрд дярябкъюриз хьадан гъадри шулдар. Гьаддиз йиз гафариз кьувват вуди текрар апIураза: гъит завариин Аллагь, хъа жилариин Путинсир паччагь ишри!
Кьюб келима Украинайиъ кабхьнайи цIиканра пуз ккундузуз. Гъит Ватандин гъуллугънаъ айи кьягьялар, хъадакну, сагъ-саламатди багъридарихьна гъюри. Халкьарин арайиъ ислягьвалин ва манишнан ялавнакан дуствалин гъала ибшри», – гъапнийи улариина нивгъ гъюрайи Аьйшат бабу.
