Айгуль Мягьямедова
2025-пи йисан 14-пи майди Дагъустандин Глава Сергей Меликовди Дагъустан Республикайин лайикьлу артист, Хив райондин культурайинна рягьятвал гъадабгъбан центрин солист Марьям Къазиевайиз «Дагъустан Республикайин халкьдин артист» кIуру гьюрматнан ччвур тувну.
Табасаран эстрадайин варитIан аку хяд Марьям Къазиева Хив райондин Фурдагъ гъулаъ Зейнудин ва Гьаваханум Къазиеварин табасаран халкьдин вари аьдатар уьрхюрайи албагу хизандиъ бабкан гъахьну. Думу хизандиъ 10 веледдикан кьюрпир, хъа шубарикан аьхюнур вуйи. БицIи вахтнахъанмина риш, халачи убхури, гвар хьади булагъдиккна штуз гъягъюри, дадайиз хизандин ляхнариз, бицIину чвйиризна чйириз хъайивал апIуз кюмек апIури, аьхю гъахьну. Марьям бицIи вахтнахъанмина мяълийир апIуз ккунир вуйи.
Мектеб ккудубкIбан кьяляхъ, Марьям Къазиева Мягьячгъалайиъ музыкайин училищейик урхуз кучIвну ва думу хъуркьувалиинди ккудубкIну.
Сягьнайиин Марьям Къазиевайи кIваантIан зегьмет зигура. Тамашачйир дугъкан гьарган разиди, дугъан сес кубкIайиз ккилигури шулу. Гьаддиз Табасарандиъси, вари Дагъустандиъра Марьям Къазиевайин мяъли деребхьур адаршул. Дугъан сесниинди апIурайи мяъли наан ашра аьгъю шулу.
Украинайиъ хусуси метлеб айи дявдин операция ккебгъхъанмина Марьям Къазиева ихь эскрариз рягьимлувалин кюмек хъадапIбан ляхниъра жанлуди иштирак шула. Гьаму йисан дугъу Хив ва Табасаран районариъ кьюб концерт гъухну ва гъабхьи гъазанж хусуси метлеб айи дявдин операция гъябгъюрайи йишваъ гъуллугъ апIурайи ихь эскрариз хъадапIну. Дугъан апIурайи хайлин таза мяълийир ихь эскрарин игитвализ, ватанпервервализ, дурарин дадйирин ва хупарин сабурлувализ бахш дапIнайидар ву.
Гьюрматлу Марьям Къазиева!
«Табасарандин нурар» газатдин редакцияйин коллективди уву ихь миллет машгьур апIурайи аку хядси кьабул апIура. Учу яв хъуркьувалариин гизаф шад вуча. Аллагьди увуз жандин сагъвал туври, инсанарин юкIвар шад апIбан рякъюъ хъана заан хъуркьувалар ишри.
