Мейлан Нежефов
Гъараха, дагълариъ гъилибцу аслан,
уьбхюз кIури ихь аьзиз вуйи Ватан.
Лазим гъабхьиш, гьяйиф дарди тув яв жан,
увуз нифрат шулиз, усалвал гъапIиш.
«Зумруд Ханмягьмадовайин му гафар гъубшу йисан сентябрин аьхириъ мобилизацияйин дахилнаъди гъуллугъ апIуз гъягъюрайидарин дестейиъ айи йиз бай Замириз, ватанпервервалин насигьят ккатIабццбиин лихури, йиз мелзналан гъапунза», – ктибтура Лида Гьясановайи (шиклиъ).
Лида Гьясанова чан уьмрин юлдаш Танмирзайихъди Хив райондин Хирижв гъулаъ яшамиш шула. Уьмрин вафалу юлдшариз 1997-пи йисан 24-пи июнди гъи ихь жил’ин ислягьвал ккунди, жюрэтлу игитвал улупурайи кьягьял бабкан гъахьну.
Багъри гъулан кьялан мектеб ккудубкIбалан кьяляхъ Замири ватанди чан гъюнариин илипнайи армияйин буржира баркаллуди кIулиз адабгъуру. Сад йис тамам хьайизра, думу мобилизацияйин дахилнаъди Украинайин сяргьятариин вари Урусатди гъабхурайи хусуси метлеб айи дявдин иштиракчи гъахьну.
«Мобилизацияйик кахъундайишра думу дина гъягърубдиин узу инанмиш вуйза. Фицики дугъаз узура, гъужайира тувнайи насигьят гьациб вуйич. Ав, бабан юкIв ву, тIубкIурайиз, йишв-йигъ дугъан дихназ ккилигури, телефон улиъ уьбхюраза. Хъа гьарсар бабаз, Худайи чаз жили велед тувган, аьгъяди ккунду, дугъак чан, бабанси, Ватандинра пай кайиб. Жил’ина инсаният халкь гъапIхъантина гьациб аьдат ву. Ухьура, гьадму ата-бабйирин ирс уьбхюри, дурарин гьунарар гьисс апIури, уьл дипIну ккунду. Фици ва фу ккундуш ибшри дупну, уьмур хъапIну ккундар. Му гафар йиз бализ гьар йигъандин дарсар вуйиз. Чухсагъул чаз, дурар кIвак гъидису.
Узу умудлу вуза, Замир, усалваликк кIул ккидривди, душмнихьди чав ккагъуз ва узухьди кIул мухриъ ипуз гъидритди, хъа анжагъ гъалибвал кIваъ ади, пайдагъ зади гъулаз, хулаз гъюрубдиин. Дадин гьаму гафар кIулиз ададагъиш, душмниз йирфар йивну гьергиш, валлагьи, гъубхъу никк гьялал дарапIарзавуз», – кIура Лида Багьаудиновнайи.
Гьаму вари вахтна Замир анжагъ чаз велед гъашигантIан гъулаз деетундар, гьадмура йицIуд йигъаз. Уьмрин юлдаш Фарида ва юкьуб вазлин бицIи бика Амина кьил ва уьл хил’ин алди аьхю баб Лидайихъди игит адашдиз ва дугъан ярар-дустариз ккилигура.
